La Usc di Ladins

»La toponomastica per ladin, soraldut ti teritories olache chest lengaz l é vif e con reijes fones, la raprejentea n valor fondamentèl che cogn vegnir conservà e uzà fora con forza: no se trata de na costion demò formèla, ma de n element de autentizità che ge dèsc valor e originalità ence al marketing del teritorie«. Con chesta paroles l assessor regionèl a la mendranzes linguistiches Luca Guglielmi l entervegn tel debatit vegnù fora per la prejentazion de la neva identità visiva del raion turistich Plan de Corones. Tel recognoscer l lurier de gran ezelenza di impianc portamont, bogn de garantir standard zis auc a livel internazionèl, Guglielmi sotrissea coche l svilup de chest setor l cogn jir ensema co la valorisazion del patrimonie culturèl e linguistich del post.

»La inovazion grafica e la strategies de posizionament del marcià global no cogn jir de contra a la reijes de noscia valèdes – l à dit amò apede l assessor – dut auter, te n setor turistich che l chier semper de più identitèdes autentiches e esperienzes foradeanter, la spezifizità del lengaz e de la cultura ladina doventa n pont de forza straordenèr per l brand medemo. Col uzèr fora n teritorie duran sie inomes storics no ge vegn tout forza a la comunicazion, alincontra ge vegn dat sotanza e individualità«.