La Usc di Ladins

En mèrtesc ai 8 de jugn l Consei provinzièl de Trent à tout dant l dessegn de lege nr 79 del conseier Luca Guglielmi, che integrea l’articol 2 de la Lege provinzièla nr 7 dai 15 de jugn del 2005 sul Consei de la Autonomies Locales.

L ddl, portà dant da Guglielmi ai 23 de november 2020, jonta ite ence la fegura del Procurador del Comun General de Fascia o n sie delegà anter i componenc del Consei de la Autonomies, a na vida da ge arsegurèr al CGF la raprejentanza te chest organism che tol pèrt a la sceltes de carater istituzionèl te l’atività legislativa e aministrativa de la Provinzia de Trent.

L besegn che l ruol del Comun General de Fascia vegne recognosciù e disciplinà da la PAT, dò l recognosciment costituzionèl arjont de l’ent soracomunèl fascian del 2017, era stat palesà con forza dal Procurador e da duc i aministradores fascegn e apontin ai 23 de november del 2020 Detomas ge aea consegnà al president del Consei provinzièl Walter Kaswalder na petizion populèra sotescrita ence da duc i ombolc fascegn e l conseier Guglielmi aea formalisà l’azion a livel legislatif con la prejentazion del dessegn de lege.

L ddl era stat tout dant da la Pruma Comiscion legislativa de la Provinzia tel meis de firé e tant te la Comiscion che te l’aula l’à troà l sostegn a una de duc i schieramenc politics, con gran sodesfazion del Conseier ladin, che à sotrissà l’emportanza de chest vèrech per la valorisazion del CGF.

Se trata del prum vèrech emportant sul percors domanà da la petizion che à uzà fora l besegn che l Consei provinzièl tole dant la costion del Comun general de Fascia a na vida più globala te l’ordenament di enc locai.

 (Lucia Gross)