La Usc di Ladins

L ie na dumënia d’ansciuda a mesa l zënter de Sëlva. L surëdl se mostra maestëus sëura l gran parëi de Mëisules, che cun si tonalità de grija gaujea n beliscimo cuntrast cun l brum dl ciel zënza nibles. L lecorda l cuntrast di dis grijes y mpaziei a mesa la sajon y la gheneda dl prim di do la sajon. I uciei scibla si inn al’ansciuda y l ie n plajëi se n sté sun piguel y, coche n Diogenes te si barijel, se cunzeder ai raies dl surëdl. L te vën da stlù i uedli, da tré ite sot l fla. Zënza che ne te rëndes povester cont, vën l cuer aicià da n sentimënt de cuntentëza mujela. »Ce fertunei che son a viver te na tel bela val«, te vën da pensé. Pona, sciche na stranudeda ntan n cunzert de archëc, n auto che passa. Belau da se pierder te n prim mumënt, a mesa dut ch’l chiet che lecorda chël de dan cater ani, a mesa l lockdown, canche l uet fova unì sfurzà su y la jënt messova se n sté te cësa. Nce chësta sajon ie fineda via. (Comentar de Ivan Senoner)

De plu tla edizion stampeda de La Usc di Ladins o sun l e-paper a paiament www.lausc.it/e-paper