La Usc di Ladins

Proon a se fegurar che che fossa aldidanché de noscia cultura e lengaz se no fossa stat l'Union Generela e le Union de valada.

Vegnissel amò rejonà ladin?
Per tegnir su l lengaz la Union à realisà i sfoes ladins: Nos Ladins fin dal 1949, doventà La Usc di Ladins del 1972. L’Union de Fascia à  metù su La Veisc, La Ousc de Fascia e Nosha Jent, l'à endrezà i prumes vocabolaries, i prumes corsc de grafia ladina, l’à vardà de sensibilisar la jent a rejonar ladin te vigni moment de la vita soziala e privata e la se à batù con pie e con man per aer l ladin te scola e l ensegnament del todesch desché i ladins de Gherdena e Badia.

L’Union àla fat scomenzadive per i joegn?
A Rorei, olache l era joegn fascegn che jia a studiar, con don Mazzel l era stat metù en pe l Club studenc ladins, e da chisc l é vegnù fora i prumes maestres canche se à podù aer l ladin te scola: l era i egn ’70.

Zenza Union assane n Comun General?
Del 1968 la Provinzia de Trent à pissà de meter en pe i Comprenjories e de meter Fascia e Fiem ensema te n soul Comprenjorie. L'Union se à dat ju con forza adum coi Consees de comun e de gra a chisc militanc do na batalia de 7 egn del 1978 l é nasciù l Comprenjorie Ladin de Fascia, doventà dapò Comun General de Fascia.

Se pel lejer dut su La Usc nr 27 dai 18 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.







 (Fernando Brunel)