La Usc di Ladins

»Unizité«
Pröma mostra personala de Valeria Federa d’Al Plan. Festa de daurida en sabeda ai 23 de ma dales 18:00, tl Studio Zona a Pedraces/Badia
Tl local dles mostres Studio Zona a Pedraces gnarál metü fora dai 23 de ma inant, por otedé cina ai 31 de ma (vigni de dales 15:00 ales 18:00), na cerna de chedri de Valeria Fe­dera d’Al Plan, che se dedichëia da plü agn incá intensivamënter al’ert figurativa, danta­döt ala pitöra. Ampla é la paleta de contignü de Valeria, che la vega da ciapé ite tl monn dla mostra y publicaziun artistica.
La festa de daurida é söl program en chësta sabeda ai 23 de ma 2026 dales 18:00.

»Intreciamënt ladin«

• 
•  

View the embedded image gallery online at:
https://www.lausc.it/manifestazions-y-evenc/31849-manifestazions-atuales-speziales#sigProId64e8d1d6a2

tl Museum Ladin Ciastel de Tor
I sëis dër bel inviá ala vernissaja dla 8. Trienala Ladina y Pest Richard Agreiter, en vëndres ai 22 de ma dales 18:00, cun aperitif y musiga de Chris Costa
La pratica dl cianté y l’eserzize dla musiga rapresentëia dui pilastri fondamentai dla cultura ladina da inlaota y da sëgn. 
Les operes dla Trienala, realisades aposta por chësta tematica da Isabell Pitscheider, Ernestina Abbühl, Barbara Tavella, Tobias Tavella y le duo Youlee Ku y Fabian Feichter, adöm al davagnadú dl Pest Richard Agreiter Arnold Holzknecht y al »special project« de plurale, costituësc na odlada multifocala sön la cultura musicala ladina y sön la relaziun anzestrala cun la dimenjiun naturala. 
La mostra vëgn daurida incö vëndres, ai 22 de ma dales 18:00, tl Museum Ladin Cia­stel de Tor. L’entrada é gratis.

»31,1246667«
L’EPL mët ora tl Tublà da Nives te Sëlva na coletiva, l titul ie tëut dala spersa de 31,1246667 m2 che uni artist:a à a despusizion
L’assoziazion culturela y lerch espositiva Tublà da Nives te Sëlva nvieia a na mostra de gru­pa dl’uni­on culturela y artistica EPL-Ert por i Ladins dla Val Badia, sezion de ert figurativa. 
La grupa tl Tublà da Nives ie metuda adum da David Brand­lechner, Fabian Feichter, Franz lrsara, Gaia Lio­nello, Mattia Maldonado, Ed­mund Nagler, Maria Pezzedi, Giovanni Rindler, Roberta Sottara, Ursula Tavella, Brigitte Trieb y Jutta Valentini. La mo­stra ie da udëi nchin ai 11 de juni 2026 uni di dala 16:00 ala 19:00 (nia de lunesc).

»La vita é some«
L’EPL-Ert por i Ladins inviëia ala presentaziun dla pröma racoiüda de poesies de Carlo Suani, che sará en jöbia ai 28 de ma, dales 20:00, tl Istitut Ladin a San Martin de Tor
Al é da se inconforté al liber, pröm y nü, de poe­sies originales ladines de Carlo Suani d’Al Plan. Le liber vëgn dé fora dal’EPL-Ert por i Ladins ODV y tol ite 324 plates che partësc sö les poesies te plü capitui. Carlo Suani é un di poec plü premiá de nüsc tëmps contemporans tla Ladinia. Deplü é i pröms pesć che al á pié do en gaujiun de ediziuns dl pest lirich »Angelo Trebo«. 
Le titul dl liber é »La vita é some« desco lait­motif dla fantasia y creativité leterara. La pröma pre­sentaziun dl liber sará ai 28 de ma dales 20:00, tl Istitut Ladin a San Mar­­tin de Tor, la secunda spo ai 12 de jügn dales 18:00, tla Cësa di Ladins a Urtijëi.