La Usc di Ladins

Per sotrissé la viveza y la unité anter i ladins a na vida lesiera él vegnù mostré trei filmac, curtes testemonianzes sun l popul dles Dolomites. La presidenta Milva Mussner à prejenté ‘Ladinia, l raion di Ladins’, con test de Roland Verra che te 7 menuc, con la videocomposizion moderna dl joen Martin Demetz da Ortijëi, met dant i momenc storics plu emportanc, conté per ladin dolomitan da Pablo Palfrader y con sot titui da cerne anter talian, todesch y ingleis. Na produzion che sarà de utl per nes fé conesce te vigni ocajion locala y souralocala y per ti ruvé a na vida sourida ence a les generazions nueves.

Na gran bela scomenciadiva per tegnì adum i ladins é vegnuda prejenteda da la presidenta dla Union di Ladins de Gherdëina Sofia Stuflesser: al se trata de n portal olà che an pò ciarié su dut chel che reverda i ladins: scric, registrazion y partidures de cianties, filmac, pdf de libri y auter, per ti permete de giaté saurì te un soul luech dut l material prodot da sociazions, istituzions y jent ladina o ence da d’autri ma che reverda i ladins: material che ades é spartì fora te zirca 20 plates web desferentes.

Se pel lejer dut su La Usc nr 27 dai 18 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (LG)