La Usc di Ladins

Dit damperfora: l’intervënt dla domënia passada n’á albü por fortüna degügn feris y gnanca degügn danns, mo al é un de chi che vá ite tles coriosités de nüsc tëmps. I Stödafüs d’Al Plan é gnüs alarmá dales 20:39 por jí cuntra Gran Fanes á trá sö n meso che ne rovâ nia plü inant.
Canche i omi é rová sö, n’êl indere degügn por incërch – cunta le comandant Christian Rindler. Do na telefonada tla zentrala, él gnü fora che le meso ê jü di versc cuntra Cortina. Insciö é i Stödafüs defata rové pro n pulmin olache cun laite n grup de cineji. Chisc orô pordërt rové ia en Ampëz, madër che le navigadú i â mená ite por la Val de Mareo y sö por munt. Scebëgn che les tofles y limitaziuns é dades dant, s’á le grup impó lascé sön la tecnica y é jü ite y sön Fanes, inant por le Ju de Limo y jö cuntra Gran Fanes. Da dailó ái ót cuntra Lagoscí, á cinamai despassé ia n toch olache al ê gnü jö dan da n pez na picia roa. Dedô ési indere tacá y deache al ê oramai scuranta scür, á le grup dé óta. Le pulmin n’ê indere nia n 4x4 y porchël nia sterch aladô da jí sö zoruch por n maiú ërt.
Chiló él spo sté i Stödafüs che á fat deplëgn so laur, á trat sö le meso y á acompagné le grup cina jö Pederü. Sciöche dit, döt jü a bun fin, olache ince le comandant baia de fortüna, te na situaziun che ascognô zënzater sü prighi. De chësta minunga ê bëgn ince i turisć, che ê plü co contënc y dassënn reconescënc da avëi ciafé aiüt te na te situaziun tan stramba, che ai se recordará zënzater por na vita. Ciamó maiú é stada la morvëia canche ai á aldí che al n’ê da paié nia, deache chësc é scemplamënter le sorvisc che i stödafüch fej. N sorvisc che i cinesc á indere impó orü onoré... te chësc caje cun na spënora bindebó generosa.  (pablo)