La Usc di Ladins

L’à inom Petra e l é la mascotte del Museo Geologich de la Dolomites de Pardac, senta teritorièla del MUSE de Trent. L é na guida spezièla, protagonista de n percors che à inom apontin »Al museo con Petra« e che mena e compagna i bec e si genitores te n viac gustegol e enteressant per cognoscer l lengaz de la crepes, di fossii e di minerèi de noscia Dolomites patrimonie mondièl Unesco. 
Petra la fèsc colezion de minerèi, la é pascionèda de geologia e la envia e engaissa duc a descorir la storia: na storia che pea via dai prumes geologs che del 1800 é rué chiò a studièr nesc monts, ma ence chela n muie più veia. Defat nesc crepes, con sia composizion e stratificazions, l é desche n ‘liber de sas’ che conta la storia de 280 milions de egn, n temp desmesurà, secoi canche te nosc raion l é ruà ence besties oramai desvanides desche i saures, e adertura l mèr con organismes che à lascià sia pedies ti fossii e ti minerèi: n viac maraveous che ne fèsc descorir chisc monts unics e straordenères.
Chest percors l é conseà per bec dai 6 ai 10 egn e se pel l domanèr al Museo de la Dolomites de Pardac, che l é avert dal mèrtesc a la domenia. De autra informazions su www.muse.it

 (LG)