La Usc di Ladins

Nia da creie, che persones che ne conesc no nosta storia, no nost teritore y nience nost lingaz ladin comenteia sun l portal social facebook con emozion, senn, falsités y ence ideologia nazionalista taliana la publicazion de na intervista per ladin de na atleta ladina (chest, sun n canal televisif publich ladin!). Chestes ofenjions a nosta cultura, a nost sport y a nostes atletes y sies families y si paisc, é da refodé con peis y coerenza!
De positif te dut chest teater de comenc che fej mel banai y superfiziai, él che al é dl’autra pert truepes persones che à tout posizion decontra y informeia sun la realté locala plurilinguistica. De plu comentadours dij da audì l prum iade baian dl ladin, perchel se confronteiai impera positivamenter.
Anter la solidarieté che l’atleta Nicol Delago cuei, él ence chela de n grum de politics locai, reginai y nazionai, sciche Luca Zaia – ex governadour dl Venet, y la senatoura ladina Elena Testor y l assessour regional a les mendranzes Luca Guglielmi.
Ence la Union Generela di Ladins dla Dolomites con l president Roland Verra tol posizion con forza contra les insultazions dant a l’atleta ladina y azzurra Nicol Delago, y les ataches a dann dl’adoranza dl ladin che roda ti socials: "vigni critica a l’adoranza dl ladin é da rofodé, senza vertoles y compromisc!"
I recordon la Lege Taliana 482/1999 che reconesc l'esistenza de dodesc mendranzes linguistiches definides "storiches" y les scona, en atuazion dl articul 6 dla Costituzion Taliana y tla acordanza con i prinzips generai stabilis dai organisms europeics y internazionai: la Republica scona l lingaz y la cultura dles popolazions albaneises, catalanes, germaniches, greches, slovenes y croates y de cheles che rejona l franzeis, l franco-provenzal, l furlan, l ladin, l ozitan y l sard.

Iaco Rigo