La Usc di Ladins

»La Usc di Ladins no l é desche un di tenc sfoes che rua sul post per corir i Jeghes o desche la maor pèrt de l’autra publicazions taliènes. L setemanal scrif la neves per ladin, l lengaz più antich de la Èlpes. Enceben che l ladin sie n lengaz de mendranza te la Tèlia, l é l lengaz de maoranza te la cinch valèdes corides dal sfoi. L isolament geografich de la Dolomites ge à permetù ai sentadins de mantegnir na sia particolèra identità culturèla e linguistica: a desferenza del talian, per ejempie, l ladin à ot paroles per dir neif.«

Coscita taca via l articol de Rebecca Tauber, vegnù fora enstadì sul sito online The Athletic che fèsc pèrt del NYTimes. Tauber à tout contat con la redazion de La Usc e l’à domanà de poder aer informazions sul sfoi ladin. L’aon envièda a vegnir te la redazion de Fascia a Sèn Jan e chiò con fèr gustegol e profescional l’à domanà fora sul lengaz, su la storia di ladins, su la tradizions, su la bandiera e sul sfoi ladin.

Podede lejer dut su La Usc dai 6 de mèrz da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)