La Usc di Ladins

Atlant Toponomastich de Fodom e Col
Darè agn de laor l’Istitut Cultural Ladin Cesa da Jan l à piazer de prejentà a la jent l nuof Atlant Toponomastich de Fodom e Col
L laor, nassù da la colaborazion del Istitut con le doi Aministraziogn de Comun de Col e Fodom e col sostegn de la Region Trentin-Südtirol, l é stà sarà via nten bel cofanet con ite cuater carte che ciol ite passa 3500 inom de luoch.
A Col la prejentazion la é perve­duda marcui ai 29 de auril da le 18.00 ntei locai del Palafursil (l nuof zentro congres de le Miniere), a Fodom juoba ai 30 de auril da le 20.30 ntel salf del Tau­lac a La Plié. A le famee de Col e Fodom che vegnarà a la prejentazion, le doi Aministraziogn de Comun i avarà piazer de sporje debant na copia del Atlant.

»Ciastel de Tor: Fami­lies y descendënzes«
Le Museum Ladin Ciastel de Tor á le plajëi da Ves invié ala presentaziun dl liber de Irma Trebo, en sabeda ai 9 de ma dales 11:00
Le liber é na inrescida genealogica dles döes families Trebo y Zingerle de Tor a San Martin, cun na odlada interessanta te süa storia. L’auturia Irma Trebo, instëssa nasciüda y chersciüda sö tl Ciastel, á cherié na publicaziun che nes cunta olache les descendënzes dles döes families é tla spana de 200 agn indlunch rovades.
Dales 11:00 él la presentaziun dl liber, dales 12:00 n pice renfrësch y dales 13:00 él söl pro­gram vijites menades fora por le ciastel, cun testemoni dl tëmp – por ladin y por todësch. Les vijites é debann.

Cursc cun Pia Pedevilla
Trëi cursc tl mëis de ma, tl atelier a Bornech
Cörs de vigni sort
Curs por mituns y mitans (acompagná) y insegnanc, en vëndres ai 8 de ma dales 14:30 ales 17:30. An pó fá de pici chedri acrilics, scatores a forma de cör de lëgn y ton o cörs de metal cun perles da taché sö. Cost: 45,00 € plü 20 de material.
Chefri de Santa Maria y ater
Curs por mituns y mitans (acompagná), en sabeda ai 9 de ma dales 14:00 ales 18:00. Les figöres de lëgn che an pó ince fá: arosć, bisces, vaces, iac, cians y zbergli. Cost: 60,00 € plü 25 de material.
Figöres de lëgn por l’aisciöda
Curs por adulc y mituns da 10–11 agn insö, en domënia ai 10 de ma dales 14:00 ales 18:00. Les figöres de lëgn por daite y por l’urt (ciases, vicí, ciüfs, alces, cörs...) vëgn decorades cun de vigni sort de tecniches y cun materiai dla natöra. Cost: 60,00 € plü 25 de material.
Cursc en colaboraziun cun l’EPL, tignis tl atelier de Pia Pedevilla (Gross Gerau Promenade 6c) a Bornech. Al vëgn tut sö 6 partezipanc a curs (i acompagnadus ne paia nia). Info y iscriziuns pro Pia Pedevilla al 348 2221745 o info@piapedevilla.com

Cëna y teater
La cëna cun teater vëgn pitada en vëndres ai 8 de ma a Corvara y la sabeda ai 9 de ma a Al Plan, dagnora dales 19:00
La Uniun dles ëres da Corvara y le Consëi de formaziun d’Al Plan organisëia na cëna cun n teater criminal, olache le publich é invié da stomé che che é l’assassin dla sto­ria, che sará da odëi tratan cëna sön paladina. Al jobelnëia Lucia Cirella, Marco Moscon, An­dreas Peccei, Sabine Rudiferia, Tobias Stampfer y Susann Tavella. La rejia é de Erika Castlunger
La cëna y teater é: en vëndres ai 8 de ma dales 19:00 tl salf dles manifestaziuns a Cor­vara, prenotaziuns y informaziuns pro Sonia al 349 1588485; en sabeda ai 9 de ma dales 19:00 tl salf dles manifestaziuns a Al Plan, pre­no­taziuns y informaziuns pro Barbara al 333 9671108 (ince por WhatsApp, la pre­nota­ziun á valüta do la conferma scrita).

Rina: conzert d’aisciöda
La Musiga da Rina á le plajëi da ves invié dër bel al conzert d’aisciöda, en sabeda ai 2 de ma dales 20:00, te palestra
Le program musical é metü adöm dal dirighënt Martin Egger, che á chirí fora meldoies conesciü­des, tradizionales y mo­dernes. La moderaziun dl conzert é surandada a Timo Craffo­nara. 
Dilan bele danfora a düc chi che fej val’ sorvisc por che le conzert garetes. 
N dilan particolar ti vá a düc i mëmbri dla Musiga da Rina, por l’impëgn che ai dá por l’uniun.

35 ani de atletica
La lia Atletica Gherdëina festejea si iubileum n sada, ai 25 de auril
La lia Atletica Gherdëina, cun si sezion dla ginastica artistica, nvieia duc si cumëmbri, atlec, ex-atlec, alenadëures y duc i simpatisanc de chësc bel sport ala festa dl iubileum de 35 ani dla lia. La festa unirà fata n sada ai 25 de auril dala 17:00 tla Sala de Teater a Santa Cristina cun la prejënza de truepa autoriteies.
L fova ai 29 de auril dl 1991 canche n valgun apasciunei de sauté se ova metù adum y metù su la lia dl’Atletica Gherdëina. Te chisc 35 ani à la lia arjont de biei resultac nia mé sportifs, ma nce ti nsenian a milesc y milesc de mëndri a sauté, a se muever, y a se cuordiné. Trueps scric ite à nce arjont de biei resultac. Al didancuei iel feter 200 scric ite y ie nscila una dla majera lies sportives dla valeda.
Sun Vosc unì se ncunforta l cunsëi dla lia y l presidënt!