La Usc di Ladins

L é stat la trasmiscions per todesch sul tegnir provinzièl l argoment maor de la XLII Conferenza per la mendranzes, chiamèda ite online en mèrtesc prum de setember.

Na convocazion de prescia per aer l parer di raprejentanc de duta trei la mendranzes ladina, mochena e zimbra loghèdes sul teritorie trentin, dant de poder ge sperlongèr l contrat per seghitèr a manèr fora te dut l Trentin la trasmiscions de ORF1 e ORF Sport: benstèr de obligh ajache se rejona del budget provinzièl per la mendranzes linguistiches.
Ence chest'outa a vidèr l desch de confront anter i esponenc de la trei comunanzes ladina, mochena e zimbra l é stat, su delega del president Maurizio Fugatti, l assessor Simone Marchiori, se cruzia ence de promozion e cognoscenza de l’Autonomia. Sentà ju apede al staff del Servije Mendranzes PAT con la dirigenta Elisabetta Sovilla, Marchiori à avert la scontrèda palesan ensema con l salut a duc i prejenc ence sia sodesfazion per esser sun chel desch apontin en vea de la Dì de l'autonomia. L à recordà a 80 egn da la cordanza De Gasperi Gruber cotant che la prejenza de la mendranzes sie stata a fondament de l'autonomia del Trentin e cotant che chesta autonomia aesse permetù de fèr crescer l stravardament de la trei mendranzes.

Autorità Mendranzes: da Castellan a Paolaz
Matteo Nicolussi Castellan, che l era te la Conferenza de la mendranzes desche ombolt de Lusérn, l fajea pèrt jà dant de chest desch de confront, ajache l era component de l'Autorità per la mendranzes linguistiches. Aldò de sia neva encèria, ai 8 de setember l Consei Provinzièl à aproà la nomina del nef component de l'Autorità a sie post te la persona de Fabiana Nicolussi Paolaz.


Podede lejer dut su La Usc stampèda de vender ai 11 de setember da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)