La Usc di Ladins

Tl 2005 spazirâi cun chëra che é incö mia fomena, a chi tëmps chestiana, fora por les campa­gnes d'La Rioja, tl nord dla Spagna. I jôn, vare do vare, le tru de Santiago de Compostela.
Piá ia a autostop d'Al Plan cun n compagn cina a Bornech, spo cun la ferata ia por le nord dla Talia y cëch sö danter la Francia cina a Lourdes por rové spo al metëman de nosc tru a pe: Saint Jean Pied de Port, tla pert franzeja di Pirenei.
Te chi dis de chësta picia cuntia, do zirca 7 dis de pelegrinaje, jônse n toch dër plajor de nosc tru, fora por vals y coi ric de vegetaziun. Campagnes tignides cun amur dla porsona. Le tëmp ê bun y les spines dl Camino sintînse püch – y nia.
Le ji a pe tla Natöra, ores y ores vigni de, ê na gran fontana d'esperiënza y d'ispiraziun. Grazies de Dî por chi che crëi – belëzes dla Vita por i atri.
Sambëgn che i ên ciamó dër jogn y idealisć... mo en chël de, ái ciafé un de mi maius inse­gnamënc dl Camino. N insegnamënt söla sanité... y söl amur: »An dij che la cossa plü importanta sides la sanité«... ti dijôi a Sandra... »mo incö ái capí che ara n'é nia insciö«. Ëra mo scutâ sö y aspetâ che i jiss inant. »La cossa plü importanta é l'amur – fondamënta de vigni sanité.«
»Ciodí dijte chësc?« me damanâra... y ince sce i ne me recordi nia vigni parora, ê le significat chësc: »Canche na porsona é sana, sce al ti vëgn tut o sce ara se lascia tó l'amur, ti vëgnel tut la fondamënta sön chëra che la sanité pois crësce y florí. Ara s'amarëia de val' vers. Mo sce ara se proa ti pinsiers, tles operes y tles misciuns, da romagne frëma söla fondamën­ta dl amur, spo póra indô varí – scialdi da döt. L'amur dantadöt che an dá – ai atri y a se instësc – mo ince chël che an ciafa – dai atri y dala Vita. Eco, la fondamënta dla sanité é l'amur. Zënza amur, degüna sanité tl tëmp. Zënza sanité, ne se romagnel co chirí indô l'amur – sce i orun vire y ester sagns.«
Jona, inamorada y idealistica, insciö éra chë picia löm che m'é gnüda scincada tl plajor de chël de. Chësta picia löm romagnará dagnora alta y sota te mi sentimënc, te mies esperiënzes y te mi iolans.  (Nicol Alberti dal Bagn, Al Plan)