La Usc di Ladins

L é scomenzà con gran sbunf chest istà l Panorama Music Festival. La edizion torona numer 10 à volù ge dedichèr amò maor lèrga a la musega de la comunanzes de mendranza linguistica, col projet »Lengac de mendranza, musega èrt e letradura« endrezà da La Grenz e dal diretor artistich Enrico Tommasini col sostegn de la Region Trentin-Südtirol, de la Provinzia de Trent, del Comun General de Fascia e del Comun de Moena.
L prum apuntament, te la senta de La Grenz a Moena en sabeda ai 28 de jugn e sui pré apede a la Malga Peniola de Moena en domenia ai 28, à portà te Fascia i »Barcelona World Music«, n grop de 6 joegn musizisć de talent en maor pèrt catalans, cresciui tel Conservatorie de Barcelona.
A La Grenz e te Fuciada dapò se à podù cognoscer n projet di più enteressanc e inovatives de la musega furlèna di ultimes egn, chel del cognosciù musizist Leo Virgili, con la ciantarina maraveousa Nicole Coceancig e i doi bravi strumentisć Davide Raciti a la vidola e Valeria Liva al contrabas. N projet che pesćia dalonc, tant tel temp, con elemenc del rich patrimonie de musega furlana (desche Giorgio Ferigo e i Povolâr Ensemble), che tel spazie, avisa te l’Argentina, olache per via de la migrazions aldidanché l é più furlegn che tel Friul. Chiò i à troà ispirazion te la pruma esprescions sćiantives del tango, chel durà ti egn ’30 te la betoles de Buenos Aires dai ‘tangueros’, che desche ciantastories con ousc e chitara i portèa stroz conties de amores tormenté, vendetes paèdes col sanch e encresciujum zenza fin.
La joena ciantarina furlana protagonista del conzert de november del 2024 l'à vent l premie Ciampi con ‘Di trop che o ai ciaminat’ e ‘Cjare Mame’, doi cianties che fèsc pèrt del concept album ‘Zohra’, che conta l’esperienza de na tousa de 14 egn che pea via dal Pakistan e la vif l’esperienza de mile e mile migranc per ruèr te l’Europa.

Se pel lejer dut su La Usc nr 26 dai 11 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.








 (Lucia Gross)