Iran, Iraq, Pakistan... Chisc é ma trëi stac olache tröc de nos storjess poester le nes bele ma da ponsé. Spo pa sce i messasson cinamai jí a i vijité. Tla televijiun y ti foliec liunse scialdi de burt: veres, ditatöres, represciuns, terorisć. Ci che i liun y odun dainré, é la vita da vignidé de süa jënt, süa ospitalité, forsc la scemplëza y l’ester contënc cun ci che ai á. Rodunt chësc é indere ci che Klaus Promberger da Rina á odü, conesciü y viü sön süa pel. Ël á vaghé da fá valch che tröc de nos somia magari da fá, mo ne fej nia o n’á nia la poscibilité da fá. Al 1. de ma dl 2024 él pié da ciasa demez bel su, cun na jeep fata sö aposta y te so poch ince na buna porziun de coraje. So travert ê da
rodé tl’Asia Zentrala. Na ultima "sarada" da pert de sü compagns a Perca, n salüt a süa chestiana a Sanciana, denanche lascé nosc pice monn südtirolesc do da d’ël. Otedé dedô êl a Istanbul, sön le punt dl Bosporus y passâ ia la gran tofla cun la scrita "Welcome to Asia" – Bëgngnüs tl’Asia. N valgönes tapes s’âl pa bëgn metü dant, mo en gran pert ne savôl ne tan dî che al foss sté demez, ne olache al foss indlunch rové y gnanca can che al foss avisa gnü zoruch. Te Südtirol él indô rové ai 18 d’aurí 2025, do 353 dis, te chi che al á vijité 24 stac y fat incër 47 mile chilometri. Na esperiënza che al ne se desmentiará mai plü y che al á sëgn ince l’intenziun da tigní toch te n liber. I s’l un cuntada cun Klaus, por ciafé altamo na cercia de chël che é sté por ël n "ann plëgn de vita".
La gran intervista che i un fat impara, cun impresciuns fotografiches demorvëia, podëise lí y odëi t’La Usc di Ladins di 18 de messé (Intervista: Pablo Palfrader)
