La Usc di Ladins

»Kulturmeile« Gudon 2025
La sesta edizion de »Kulturmeile Gufidaun« gëura si portes ai 6 de lugio dala 10:00 nchin la 19:00
Nce chëst ann sarà l luech de Gudon na pala­dina per ert, mujiga y culinaria. 33 artisć y artistes danter i 20 y i 85 ani mustrerà dala 10:00 nchin la 19:00 si opres te verzons, plazes y ntëur la dlieja. Jì a spaz tres la »Kulturmeile« ne pieta nia mé mprescions visueles, ma nce de mujiga y culinaria. I vijitadëures jëuni ie nviei a lauré pea y deventé criatifs – n’esperienza culturela per duta la familia, nsciuma!
Duc y dutes ie de cuer nviei.

Nosc lingaz, nosc tesur
N’edema dedicada a nosc lingaz, olache al ti vëgn dé la poscibilité ai ghesć da imparé deplü sön le lingaz y la cultura dles valades ladines
Dai 7 ai 11 de messé vëgnel metü a jí l’iniziativa »Nosc lingaz, nosc tesur« liada al lingaz ladin, cun cursc de ladin, na vijita al Museum Ladin y na sëra cun musiga y bai tradizionai. L’edema mët man cun le curs de ladin adöm a Daria Valentin, dales 9:00 tl salf dles manifetaziuns a La Ila, che gnará ince pité ai 8, 10 y 11 de messé. Le mertesc sëra dales 21:15 podarán aldí musiga ladina acompagnada da bai tradizionai, te salf dles manifestaziuns a La Ila. Le mercui dales 15:00 él söl program la vijita al Museum Ladin Ciastel de Tor adöm a Daria. La vijita gnará stlüta jö cun n pice aperitif. L’edema dedicada a nosc lingaz se stlüj jö cun na sëra dal titul »La storia di ladins dles Dolomites… secundo me«. Dales 21:15 porta dant Simon Kostner i avenimënc dla storia di ladins. Por tó pert ai cursc de ladin y ala vijita tl Museum Ladin, mësson se scrí ite ti ofizi turistics dl’Alta Badia o online. Düc i apuntamënc é debann y ales manife­staziuns da sëra pón tó pert sënza iscriziun.

Fotografies vedles y na app por San Martin
Tl salf dl Istitut a San Martin de Tor vëgnel daurí ai 10 de messé na mostra de fotografies vedles y presenté n’aplicaziun interativa
En jöbia ai 10 de messé dales 18:00 é düc inviá tl salf dl Istitut Ladin »Micurá de Rü« a San Martin de Tor, olache al sará la daurida de na mostra de fotografies vedles, cun la presentaziun de na app interativa sura le paisc da San Martin. Söl program él le salüt dles au­torités, la presentaziun y ala fin n refrësch por düc. 
La mostra instëssa é spo daverta dai 11 ai 20 de messé dales 9:00 ales 12:00 y dales 15:00 ales 18:00. 
Or­­ganisaziun: Istitut Ladin y SMACH.

Segra da La Val
Ai 5 y 6 de messé vëgnel fat gran festa a La Val, por la segra dl paisc
La Jonëza da Paur y i Stüdafüch da La Val á le plajëi da invié ala Segra da La Val, tla fin dl’edema di 5 y 6 de messé. La festa mët bele man la sabeda ai 5 dales 15:30, cun l’alzada dl »Kirschta­michl«. Dales 18:30 inant él spo la poscibilité da cené y dales 20:00 inant sona le grup »Wio und di Oane«. La domënia dales 7:00 da doman sarál spo les musighes da La Val y da Pfronten che de­scëda le paisc cun so bun sonn y dales 10:00 él la Musiga da La Val che tëgn conzert. 
Dales 11:00 inant él indô la po­scibilité da marné, dales 11:30 sona la Musiga da Pfronten y dales 16:00 vá sön paladina le grup »Lederhosenfeeling«.

Ert tla tor 2025
Le

• 
•  

View the embedded image gallery online at:
https://www.lausc.it/manifestazions-y-evenc/29851-manifestazions-atuales-speziales#sigProId533491c190

Museum Ladin inviëia ala daurida dla terza ediziun de »ert tla tor 2025«, olache al vëgn presenté en chësc ann na mostra personala de Elisa Rungger dal titul »Danterite«
La daurida é en jöbia ai 17 de messé dales 18:00 tl MusLa Cia­stel de Tor. Cun aperitif y musiga dla DJ Odo Waants, entrada gratis. Cun chësta mostra röia Elisa Rungger (*1997) zoruch te so post de na­sciüda, olache ara presënta süa ert te na mostra perso­nala por le pröm iade. 
L’artista vëiga sües operes sciöche danterlercs: posć de per­zeziun che ne definësc nia de definitif, mo che mostra realtés en movimënt: monns d’imajes, olache i confins se desfanta y i significac se sposta.

Tecniches de autoaiüt por le me de ce
De chësc nen vára te n seminar, en mercui ai 9 de messé domisdé, te scora mesana a La Ila
Le me de ce é un di desturbs de sanité che vëgn dant le plü sovënz. Gonot se tira le me ciamó jö por le col y fora por les sciables. Tröpes gaujes dl me de ce é de origina muscolara y de nerfs. Le me vëgn gaujé da movimënc falá. Le Consëi de formaziun Badia mët a jí en mercui ai 9 de messé dales 15:00 ales 18:30, n seminar olache al gnará mostré tecniches speziales por curé le me de ce da susc. 
Le seminar vëgn tigní te scora mesana a La Ila y referënta é Stefanie Lepiorz Borghini. Al é da se scrí ite anter i 7 de messé ala mail cf.badia@rolmail.net

Sëira dl vin a S. Cristina
Tl raion da jì a pe Bënunì a S. Cristina vëniel inò a se l dé la sëira dl vin, n vënderdi ai 11 de lugio dala 19:30 inant. A duc i residënc cun la Val Gardena Club Card ti uniràl fat n sconto dl 50%
Na bela cumpëida de ciuleies dal vin de gran inuem de Sudtirol piterà da ciarcë na vela de vins de gran cualità, sun l tepih cueciun tl raion da ji a pe a S. Cristina. 
Leprò saràl nce me­sun se maië vel’ bon bucon servì pra plu stonc sun ëur de streda. Sam­bën unirà dut adum cum­panià da de bela mujiga suneda y cianteda dala grupes »Plumac« y »2 a holb Lederhosn«.

Formes y culëures – mostra de Andreas Senoner
La

• 
•  

View the embedded image gallery online at:
https://www.lausc.it/manifestazions-y-evenc/29851-manifestazions-atuales-speziales#sigProId533491c190

Lia Tublà da Nives nvieia ala giaurida dla mostra de pec turnei da Andreas Senoner, ncuei vënderdi ai 4 de lugio dala 20:00
La mostra prejënta i prims doi ani dl viac da turnadëur de Andreas Senoner de Sëlva: pec, scudeles y cops de uni grandëza da formes scëmples y nëtes. 
L leniam che l artist tol ca per turné, abìnel te nosc raions, nce l’ispirazion per la formes y i culëures vën n gran pert dala natura nstëssa. A chësta maniera conta i lëures finei nce na storia: la storia dl lën da chël che i ie nasciui. La ntroduzion ie de Danila Serafini. Danterite suneràl i Acajo.
La mostra resta davierta nchin ai 3 d’agost uni di ora che l lunesc, dala 16:00 ala 19:00. Merdi, mierculdi y vënderdi nce dala 20:00 ala 22:00.

Devertimënt musical cun le »Sonus Brass«
Le Festival Badiamusica pîta ai 9 de messé a Al Plan n conzert cun l’ensemble austriach »Sonus Brass Ensemble«, che porta dant toc de componisć da döt le monn
Do che le Festival Badiamusica 2025 á debuté ala fin de ma cun le conzert »Sonns sön Tru« a Corvara, röion sëgn tl zënter dl isté. Le proscim apuntamënt é por en mercui ai 9 de messé dales 21:00, sön paiun d’Al Plan, olache al sará da aldí le »Sonus Brass Ensemble«. Le grup é metü adöm da Stefan Dünser y Attila Krako ala trombëta, Jan Ströhle al trom­bone, Zoltan Holb al corn y Harald Schele ala tuba. L’ensemble se presënta en chësta sëra te na manira ligherzina y dala bona löna. Sön chësc monn matorin é i cinch musizisć austriacs dla convinziun che al sides dërt da se conzede n pü’ de devertimënt ascutan de bi toc de com­ponisć che vëgn da döt le monn.

Le »Duo Ariarathes« a Corvara
Le Festival Badiamusica vá inant ai 11 de messé dales 21:00, tl salf dles manifestaziuns da Corvara
En vëndres ai 11 de messé dales 21:00 él söl program tl salf dles manifestaziuns a Corvara n con­zert tla cornisc dl Festival Badia­musica. Sön paladina vá le »Duo Ariarathes« cun Jakob Mitterer al violoncello y Nika Afazel al piano. Sot al titul »Early Works and Swansongs« podarán aldí de Claude Debussy la »Sonate pour violoncello et piano en ré mineur«; de Ludwig van Beetho­ven les »Zwölf Variationen über ein Thema aus dem Oratorium Judas Maccabäus von Händel«; de Fryderyk Franciszek Chopin la »Sonata in g Minor« por piano y violoncello.

Paisc en festa a San Ciascian
Ai 9 de messé le pröm apuntamënt cun Paisc en festa, fora por le zënter da San Ciascian, olache al vëgn pité musiga, spezialités gastronomiches locales y devertimënt por mituns
De messé y agost vëgnel metü a jí cater apun­tamënc cun le »Paisc en festa« tl zënter da San Ciascian. Le pröm é söl program en mercui ai 9 de messé y la manifestaziun gnará ciamó pitada ai 23 de messé, ai 6 y 20 d’agost. Dales 16:00 inant sarál n pice marcé de produc dl post y di artejans y an ciafa spezialités ga­stronomiches pro i stonc dles uniuns dl paisc sciöche ince pro n valgügn eserzizi dl post. 
I mituns pó se lascé depënje sö le müs, adinfora dl pröm apuntamënt ai 9 de messé, y ince incunté i »ranger« dl Parch natural Fanes–Senes–Braies. I apuntamënc de »Paisc en festa« gnará animá da grups musicai. Ai 9.07. podarán aldí le grup »Nice Price«, dales 19:30 ales 22:00.