La Usc di Ladins

Curs de ilustraziun
Cun l’artista Silvia Baccanti. Davert a dötes y düc dai 14 agn insö, numer stlüt de partezipaziun
Te sál bel da dessigné y/o da cunté stories? Aste interes da descurí le monn di libri da n punt de odüda nü? Ne saste gonot nia co mëte man n dessëgn, mo al te savess bel da imparé? Sce t’as respognü de sce almanco un n iade, spo é chësc le dër curs por te! L’artista y ilustradëssa Silvia Baccanti da Corvara tignará le curs por döes finsdledema, ai 26-27 de messé, y ai 2-3 d’agost 2025, sabeda y domënia, dales 13:00 ales 18:00 tl local di cursc dl Istitut Ladin Mi­curá de Rü a San Martin de Tor. Prisc: 70,00 Euro (material lapró). Organisaziun: EPL–Ert por i Ladins, informaziuns y pre­notaziuns al 349 6077942.

Curs de pitöra alaleria
Cun l’artista Jutta Valentini, dai 28 de messé al 1. de agost dales 14:00 ales 18:00. Por interessá y interessades dai 14 insö
Le curs organisé dal’uniun EPL–Ert por i Ladins in­viëia i partezipanc y les par­tezipantes da depënje na odüda alaleria, olache al vëgn naota analisé ejëmpli de laurs. Do che an á chirí fora n bel post da depënje, se dán jö cun le stüde dles destanzes, le valur di corusc y l’atmosfera dl momënt. 
Prisc de partezipaziun: 50,00 euro. Post: local di cursc tl Istitut Ladin Micurá de Rü, infos y prenotaziuns al 346 8037304, e-mail: jutta@valentini.cc

Nos dai strudli
Le strudl te dötes sües variaziuns é le protagonist dla manifestaziun »Nos dai strudli«, fora por le zënter da San Linert a Badia, ai 15 de messé dales 19:00 inant
Nü coghi y conditurs de deplü hotí y restoranc de Badia interpretëia do süa fantasia y so stil chësta spezialité. Les variaziuns de strudl duc y saré gnará pitades adöm a n bun gote de vin de Südtirol, fora por la strada prinzipala de San Linert, che vëgn stlüta al trafich dales 18:00 ales 23:00. 
Le grup »Jam’son« se crüzia dl intratignimënt musical. Por tó pert ala serada n’ól ester degöna prenotaziun y an pó cumpré i bons por i strudli bele danfora, ti ofizi turistics dl’Alta Badia o diretamënter en chë sëra tl zënter da San Linert. Sce al é bur’ tëmp, vëgn la manifestaziun spostada ai 17 de messé.

N son en estinzion
Na instalazion multimediala tel Museo Geologich de la Dolomites a Pardac ne mena a scutèr la ousc di giacees
Tel An internazionèl per l mantegniment di giacees, l Museo Geologich de la Dolomites de Pardac, senta teritorièla del MUSE de Trent, l ne propon n viac imersif che met al luster la situazion che vif te nesc tempes chisc elemenc maraveousc e delicac. 
Te la instalazion multimediala »Un suono in estinzione« èrt e geoscienzes se conjobia per contèr la vita de nosc pianet e sporjer n’esperienza acustica e sensorièla interdi­sciplinèra particolèra, con la reproduzion di sons e di rumores de n giacé che se deslebeea.
L Museo de la Dolomites de Pardac l é avert dal mèrtesc a la domenia da les 10:00 a les 13:00 e da les 16:00 a les 19:00. Tel meis de aost l é avert duc i dis col medemo orarie. La esposizion restarà fora fin ai 14 de jugn del 2026.
L é ence scontrèdes tematiches e con la MyMUSE Card se pel ite debant tant a Pardac che a Trent duta la outes che se vel. 
Info su www.muse.it

»Gadersound« – ince de jöbia sëra n conzert por festejé la 20ejima ediziun
Ai 17, 18 y 19 de messé él bëgn trëi dis de festa alaleria, a Pidrô
I sun arjigná ca coche al toca por mëte a jí la grandiscima ediziun numer 20 dl »Gadersound OpenAir«, tla bela plaza ti Plans dl Galber a Pidrô, cun deplü novités. I ves aspetun tröc a fá festa bele la jöbia cun entrada debann, dales 19:00 inant cina a mesanöt, por na sëra daldöt nöia ma por chësc 2025, adöm ai »Tirataie« y a »Alexander d’Al Plan«.
Do na jöbia sëra por se scialdé ite y recordé chisc bi agn passá adöm, vá le festival inant le vëndres y la sabeda coche da tradiziun. Le vëndres dales 17:00 cina ales 2:00 sonará »De Strangers and Galas«, »Catch a Fyah«, »Patois Brothers« y »Shanti Powa«.
La sabeda da doman ves aspeta n bun gosté y dales 10:00 cina ales 14:00 unse »Yoga Amiga«, » Sound Bath« y ativités por families, dedô vára inant cina ales 2 de nöt cun la musiga de »Chasing Rabbits«, »Blind Apex«, »Panda la 9«, »Skassapunka«, »Après la Classe« (öna dles bands plü conesciüdes dla Talia, che i n’un mai albü. Süa ciantia »Paris« vëgn ince adorada dal program televisif Le Iene) y »Rebel Rootz«. Gnide a fá festa, gnide dala bona löna y jide a ciasa contënc y plëgns de energies nöies. L’entrada é debann le vëndres y sabeda por düc chi sura i 50 agn.

Le »Duo Ariarathes« a Corvara
Le Festival Badiamusica vá inant incö ai 11 de messé dales 21:00, tl salf dles manifestaziuns da Corvara
Incö vëndres ai 11 de messé dales 21:00 él söl program tl salf dles manifestaziuns a Corvara n con­zert tla cornisc dl Festival Badia­musica. Sön paladina vá le »Duo Ariarathes« cun Jakob Mitterer al violoncello y Nika Afazel al piano. Sot al titul »Early Works and Swansongs« podarán aldí de Claude Debussy la »Sonate pour violoncello et piano en ré mineur«; de Ludwig van Beetho­ven les »Zwölf Variationen über ein Thema aus dem Oratorium Judas Maccabäus von Händel«; de Fryderyk Franciszek Chopin la »Sonata in g Minor« por piano y violoncello.

Ert tla tor 2025
Le Museum Ladin inviëia ala daurida dla terza ediziun de »ert tla tor 2025«, olache al vëgn presenté en chësc ann na mostra personala de Elisa Rungger dal titul »Danterite«
La daurida é en jöbia ai 17 de messé dales 18:00 tl MusLa Ciastel de Tor. Cun aperitif y musiga dla DJ Odo Waants, entrada gratis. Cun chësta mostra röia Elisa Rungger (*1997) zoruch te so post de nasciüda, olache ara presënta süa ert te na mostra personala por le pröm iade. L’artista vëiga sües operes sciöche danterlercs: posć de perzeziun che ne definësc nia de definitif, mo che mostra realtés en movi­mënt: monns d’imajes, olache i confins se desfanta y i signi­ficac se sposta.

»Fá munts« – tl museum a San Ciascian
Le Museum Ladin inviëia al laboratore creatif »Fá munts« en mercui, ai 16 de messé dales 16:30 ales 18:00, tl MusLa Ursus ladinicus a San Ciascian
I descoriun deboriada les munts dles Dolomites: te na manira ludica y artistica vëgnel cherié cun papier scarzé y corusc n paesaje da munts infinitamënter bel. 
Le laboratore é por mi­tuns y mitans da 4 a 8 agn. Le cost de partezipa­ziun é de 5,00€ a ce y al pó tó pert alplü 15 mitans y mituns a laboratore. 
Al vëgn perié do na prenota­ziun por mail a prenota ziuns@museumladin.it o por telefon a 0474 524020.

Degun me ai dëic y ales mans
En jöbia ai 17 de messé él a La Ila n seminar olache an pó imparé ci che an pó fá instësc cuntra le me ai dëic ales mans
Nostes mans adorunse te dötes les ativités da vigni de, mo dan­tadöt éseres dër importantes por mantigní nosta autonomia canche i sun vedli. 
Cun l’osteo­presciun lisiera, la massaja y stiramënc podunse arjunje de bugn resultac te n tëmp cört y poscibilmënter resté zënza me ai dëic y ales mans.
Le Consëi de formaziun Badia mët a jí en jöbia ai 17 de messé dales 15:00 ales 18:30 te scora mesana a La Ila n seminar cun Stefanie Lepiorz Borghini, olache al gnará mostré ci che an pó fá da susc cuntra le me. Al é da se scrí ite anter i 15 de messé ala mail cf.badia@rolmail.net 

La Bira Te Fascia
L Festival de la Bira artejanèla da mont sarà a Cianacei al Fassa Park dai 18 ai 20 de messèl
Da 13 egn l Festival de la bira artejanèla da mont se dèsc ju per valorisèr i picoi produtores che auza fora ence cultura, tradizion e identità. Chesta an ve speton dai 18 ai 20 de messèl a Cianacei te la bela location del Fassa Park, apede al percors per la rodes e a 10 menuc a pe dal zenter del paisc.
Podede cercèr passa 50 bires artejanèles de 6 produtores da Trentin, Südtirol, Sardegna, Toscana, Marche e Piemont a raprejentèr la bires e la cultures da mont de la Tèlia: Crighel Brau, Batzen Brau, Trulla, Cantina Errante, Birrificio del Catria e Brasseria Alpina.
Apede l é magnadiva a km 0, masterclass de Beer Pairing, laboratories per bec dai 3 ai 6 egn e dai 6 egn en su, musega live e legreza. Na bela neva de chest an l é l Show Cooking con la Chef e Food Influencer Virginia Sardi, en èrt Virgy’s Kitchen e na conferma aprijièda l concors »Na bira per l istà«, olache duc do aer cercià la bires, i pel cerner coluna che ge sà la miora.
Program:
En vender ai 18 l Festival l é avert da les 16:00 a les 24:00. Da les 17:30 laboratorie »MaltAttak« su prenotazion e da les 21:00 musega live col ciantautor Luca Annoni.
En sabeda ai 19 l é avert da les 16:00 a les 24:00. Da les 17:00 »MaltAttak« e Masterclass su prenotazion e da les 21:00 super spetacol de la Chernoband+Fade
En domenia ai 20 l é avert da les 12:00 a les 24:00. Laboratories da les 15:00 »Tutti i frutti+1« e da les 16:30 »Malt Attack« e Master­class; da les 18:00 Show Cooking con Virgy’s Kitchen; da les 19:30 premiazion del concors »Na bira per l istà« e da les 21:00 musega live col folk rock di Wine Barrels.
Info www.labiratefascia.it; wa 329 9159877; prenotazion per laboratories e Masterclass: labiratefascia@gmail.com