Manifestazions atuales speziales

Data

12 de agost 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 12 de agost
La net di Musical per solidarietà
La compagnia Des Etoiles e etres artisć a Poza ai 20 de aost per sostegnir Lifeline Dolomites
Do 3 egn de stop per l Covid, en sabeda ai 20 de aost da les 21:00 rua endò te tendon de Poza l spetacol straordenèr »La net di Musical«.
Ciantarins e balarins de la compagnia ‘Des Etoiles’ met amò a la leta sia braura per sostegnir i projec de Lifeline Dolomites, la sociazion fascèna nasciuda per sostegnir projec te l’Africa. Con chest musical vegn finanzià n impiant fotovoltaich per ge dèr lum e èga ciauda tel ‘Vilaje de la Vita’ tel Zambia, olache stèsc 83 bezes e touses dai 3 ai 18 egn, orfenes o che vegn da families con problemes.
A orir l spetacol sarà i Love in Lions e tolarà pèrt ence la ginasta fascèna Elisa Giovannini e na balarina da l’Ucraina. L cost l é de 10 euro, gratis per bec fin ai 10 egn e se pel se comprèr i biliec lo dal tendon en sabeda ai 20 da les 10:00 a les 12:30, da les 15:00 a les 18:00 e da sera da les 20:00 fin canche l é post.

»fiat lux« é pié ia
Tla Engelsburg a Neustift, pert dl convënt dër conesciü che festejëia en chësc ann i 880 agn de vita, él da odëi le tritich de tesć sacrai cristians, musiga y pitöra. Le proiet é davert vigni de, aldefora dles domënies y de Santa Maria dal Ciüf (dales 10:00 ales 17:00). Le conzert dl cor moscedé sot la direziun de Ludwig Rindler é vigni mertesc dales 16:00
L’EPL presentëia tla Engelsburg a Neustift cina ai 6 de setëmber 2022 la mostra cun draps intënc y musiga ciantada dal titul »fiat lux«. I draps é gnüs intënc dal artist Albert Mellauner, la musiga componüda dal maester Ludwig Rindler. L’idea, le conzet y la cerna di tesć fora dla tradiziun di convënc cristians por latin y ajuntes ladines dala liturgia contemporana é de Iaco Rigo.
Vigni mertesc dales 16:00 él söl program la presentaziun dla musiga originala da pert dl cor moscedé de set usc y percusciuns. Le conzert vëgn presenté vigni mertesc dales 16:00 cina le de dla finissaja programada por i 6 de setëmber 2022.
»fiat lux« interpretëia danü la sostanza dles ores de convënt (hores) sciöche secuënza de nüsc dis y nosta vita tla mainira dl movimënt di corusc intënc sön peza y tla sintesa di lalc tradizionai y dles cianties atuales de dlijia, la composiziun döra 25 menüc. Le proiet artistich é sostegní finanziariamënter dala Repartiziun dles Mendranzes dla Regiun Trentin–Südtirol.
L’entrada ai conzerc vigni mertesc dales cater domisdé é debann; daverta é la mostra vigni de (aldefora dla domënia y dla festa de Santa Maria dal Ciüf) dales 10:00 ales 17:00.

»Scandul te Gherdëina« – prejentazion dl liber
Prejentazion dl liber dl autëur cun l pseudonim Clambagio tla sala dla Lia Mostra d’Ert a Urtijëi, n mierculdi ai 17.08. dala 21:00. Mujiga de Linda Rungger
Te chësc luech tla Dolomites ne uel deguni n savëi de chësc mut. Nia l pere, nia la andes, niancanó l ambolt o l prelat. Ajache chësc mut ie de dan maridé y si sëula esistënza ie te chisc ani ‘50 na funtana de scandul per duta la cumenanza. Mé si gran amor zënza tëma de si oma l porta ora y ti dà n inuem, cun chël che ëila se vëija speranza per n bon daunì. Ma l ie n daunì che ëila, la bela Katharina da snait, ne puderà nia mparé a cunëscer.
Canche na man da ulëi bon tira demez l pitl mut dala sgrinfla dla tragedia, ne se rëndela nia cont che cun chësta mossa, pòrtela pro n svilup scialdi positif, che tl cërtl de n valgun ani fej deventé ora dl pitl mut n ël da talënt, rich y cun pudëi. Y do che la urità vën a lum, lascia l uëm da temëi, che ie unit ora dl pitl mut, sentì si vendëta.
Prejentazion dl liber »Scandul te Gherdëina« dl autëur Clambio de Bulsan, n mericuldi ai 17.08. dala 21:00 tla sala dla Lia Mostra d’Ert-Circolo a Urtijëi, cun mujiga danter­ite de Linda Rungger.

»Omaggio a Vivaldi«
Cunzert de doi musizisć dla Serenissima, grupa de mujiga antica de Unieja, tla sala dla Lia Mostra d’Ert a Urtijëi, n juebia ai 18.08. dala 20:30. Ntreda tres dunfierta liedia
Stefano Casaccia cun l flaut tlassich y Claudio Gasparoni cun la viola da giama sunerà chësc program: sonata n F dur »detta del Sig. Vivaldi«, sonata n G moll »Stocholm«, sonata IV n A dur »dal Pastor Fido«, sonata VI n G moll »dal Pastor Fido«. Metù su tl 1982 dal musizist y maester cunesciù de Unieja Claudio Gasparoni, se à la grupa da for incà dat ju a puntin cu la nrescidade pec de mujiga puech cunesciui de mujiga antica che se merita na rivalutazion.
L gran repertore dla grupa tol ite na lingia longia y unica de programs de mujiga antica de Unieja, taliana y europea dl medieve, dl renascimënt y dl baroch. Chësta variazion de pec vën piteda te ensambles defrënc de usc y strumënc y purtà dant cun strumënc y guant storich y antich.
L cunzert sarà tla dla Lia Mostra d’Ert-Circolo a Urtijëi n juebia ai 18.08. dala 20:30. Ntreda tres dunfierta liedia.

Sonns morjí cun »ArchEvento«
Le penultim apuntamënt cun le Festival Badiamusica 2022 vëgn tigní en mercui ai 17 d’agost dales 21:15, tla Ciasa Runcher a Badia
I protagonisć dl conzert di 17 d’agost é l’Ensemble ArchEvento, che stá por altëzes ariades y sonns de archëc morjí. N grup che cheriëia deboriada n evënt musical particolar.
Al é metü adöm da Andrea Mairhofer al fabló, Verena Gamper ala vidora, Sylvia Lanz ala viola y Christian Bertoncello al violoncelo.
Chësta sëra gnarál porté dant le »Flötenquartett in D – Dur KV 285« de Wolf­gang Amadeus Mozart, le »Streichtrio in B – Dur D 471« de Franz Schubert y le »Quartett in F – Dur op. 96« de Antonin Dvorák.

Gran final cun le »Alea Ensemble«
L’ultim conzert por le Festival Badiamusica 2022 vëgn tigní en sabeda ai 20 d’agost te dlijia da La Val
Le »Alea Ensemble« é protagonist dl ultim conzert dl Festival Badiamusica de chësc ann, söl program en sabeda ai 20 d’agost dales 21:15 te dlijia da La Val. Da aldí sarál Josef Feichter al fabló, Lukas Runggaldier ala oboa, Margareth Huber ala vidora, Ingrid Gantioler al fagot y Sigisbert Mutschlechner al orghe. I cin’ musizisć, che á scialdi düc fat esperiënzes pro orchestres de pëis internazional, portará dant chësc repertore: La »Sonata B – Dur« de Johann Friedrich Fasch, le »Trio B – Dur« de Giuseppe Ferlendis, le »Cinquieme concert La forqueray« de Jean – Philippe Rameau, le »London Trio 1« de Joseph Haydn, le »Maestoso F–Dur« de Josef Gabriel Rheinberger, la »Sonata in tre g – moll« de Georg Philipp Telemann y le »Concerto sol minore« de Antonio Vivaldi.

Cursc da jadiné
L’Ice Club Alta Badia organisëia cursc da jadiné a Corvara
Ai 22 de agost mët man i cursc da jadiné por mituns y mitans, che jará inant por döt l’altonn. Le curs é ponsé por mituns y mitans dai 4 agn insö, che oress imparé da jadiné o che sá bele n püch.
I cursc sará tres le lönesc y le mercui dales 16:00 ales 16:45 por les mitans y mituns che vá a scora, y le mertesc y la jöbia dales 15:30 ales 16:15 por mitans y mituns dla scolina. Le cost por trami i cursc é de 240,00 euro. Al é ince la poscibilité da fá ma un n iade al’edema, al cost de 160,00 euro.
Düc i mituns y dötes les mitans che á vëia da jadiné dess s’anunzié. Por informaziuns y prenotaziuns prëibel cherdé sö o scrí, anter i 20 de agost, al 333 2930586.

Festa alaleria a San Martin de Tor
La Uniun dla Musiga da San Martin de Tor organisëia la festa alaleria, ai 14 y 15 de agost, sön plaza dl paiun
La festa che gnará a s’al dé en domënia y lönesc ai 14 y 15 d’agost prevëiga chësc program.
Domënia 14.08.
Dales 18:30 scomenciamënt dla festa cun poscibilité da cené y musiga; intratignimënt musical cun Oswald Verginer.
Lönesc 15.08.
La festa mët man dales 9:30 cun la mëssa solëna te dlijia; dales 10:30 matinée cun liagnes blances cun Armin Dasser ai orghi da man. Dales 15:30 sarál n conzert dla Böhmische »Sunnberg Musikanten« y dales 18:30 inant musiga da bal cun »Odlessound«.
La Musiga da San Martin inviëia gragn y pici a sté en compagnia pro val’ da bëre y da mangé. Ai 15 gnarál ince organisé n valgügn jüc por mituns.

Festa de »Ferragosto«
Musiga, aorela cörta y gran defilada por la festa de Santa Maria dal Ciüf, ai 15 d’agost a La Ila
Ince chësc ann gnarál organisé la festa tradizionala, che mët man dales 11:30 tl zënter da La Ila. La marëna cun spezialités sciöche la griliada de cern, polënta y turtres, gnará acompagnada dales melodies dla Musiga da La Ila. Dales 13:00 inant él platleri dla Val Badia che presentëia sü bai tradizionai y dales 14:30 jarára inant cun la gran defilada, dedicada en chësc ann al tema »tëmp lëde«: al gnará rapresenté scenes di passatëmp da inlaota cina aldedaincö. Al ne manciará nia rapre­sentaziuns de scenes sciöche le carté, le chidlé, cianté y soné, trá ala scëiba y d’atres ativités sportives. La defilada vëgn acompagnada dales musighes da Afing y da La Ila. Do la defilada sarál ciamó la musiga da Afing che tëgn conzert y da sëra sona le grup »Tiroling Stones«. La festa de »Ferragosto« vëgn orga­nisada dai Stödafüch y dala Musiga da La Ila, en colaboraziun cun la Cooperativa Turistica Alta Badia.

Iluminaziun dl Sassongher
En vëndres ai 19 de agost gnarál organisé a Corvara l’iluminaziun tradizionala dl Sassongher, le crëp simbol dl paisc
La manifestaziun mët man dales 20:30. Ara gnará abelida dales melodies dla Müjiga Calfosch/Corvara, che fej l’ingres fora por le zënter de Corvara, por tigní spo n pizce con­zert sön paiun te pla­za de comun. En chësc de sarál da ti mët averda al crëp Sasson­gher, che gnará ilominé da n valgügn mëmbri dl Aiüt Alpinisć Alta Badia. L’iluminaziun podará gní amirada diretamënter dal zënter de Corvara, che resta stlüt al trafich tratan döt l’isté dales 18:00 ales 22:30. An podará ince amiré n cil da stëres y speré da odëi val’ stëra che toma.

Jöbia de Corvara
La jöbia de Corvara sará dedicada ince chëst isté al’ert ladina. La jöbia ai 18 de agost sarál deplü artisć locai che presentëia sües operes d’ert y che sona o cianta melodies
N domisdé rich d’ert, chël dla jöbia ai 18 d’agost, olache an pó se gode n bun aperitif ti locai dl zënter de Corvara, che vëgn stlüt al trafich dales 17:00 ales 22:30.
An podará ascuté sö le grup de tambürli »Sissamba« cun Max Castlunger y odëi sciöche an fej da ti dé cun la scoriada adöm a Oswald De Giovanni, che cunta ince dles tradiziuns ladines. Ermes Costa y sü scolars cun i orghi da man fistidiará ince dl intrategnimënt musical y l’artejan Matthias Peccei da La Ila mostrará l’ert dl ziplé le lëgn.
I plü pici pó se devertí pro le stont di jüc o pro Irma y Anneliese che ti depënj le müs cun les formes y les figöres che ai se chir fora, cina ales 19:00. La manifestaziun vëgn tignida dales 17:00 ales 20:00 y sce al foss bur’ tëmp, vëgnera spostada ai 25 de agost.

»Na munt de emoziuns« cun Hervé Barmasse
Pro la ligna de referac cun i alpinisć y personaji liá ales munts sot al motto »Na munt de emoziuns«, vëgnel organisé la jöbia ai 18 de agost na incuntada cun Hervé Barmasse
Hervé Barmasse é n aplinist conesciü a livel mondial, che á arpizé crëps te deplü stac sciöche la Cina, le Pakistan, le Cile y l’Argen­tina. Tratan le referat dla jöbia ai 18 d’agost cuntarál dl monn dl alpinism, olache le coraje da tó dezijiuns é dagnora lié a tëma y delicatëza. Al spligará ince tan important che al é da realisé nüsc soms, da arjunje nüsc obietifs y da afronté les desfides, savon che ara podess ince jí dlungia ia. L’incuntada cun l’alpinist y regist de films da munt, sot al titul »Oltre l’orizzonte«, vëgn tignida por talian y mët man dales 21:15, tl salf dles manifestaziuns da La Ila.
»Na munt de emoziuns« jará spo inant ai 5 de setëmber a Corvara cun Simon Gietl, tla serada »Tan de munts, ci fortüna«, en chësc iade por todësch.