La Usc di Ladins

Berstot per cuncé rodes a Urtijëi
L Chemun de Urtijëi mët a jì deberieda ala cooperativa Novum na berstot per cuncé rodes
N merdi ai 2 de setëmber puderàn, dala 12:00 ala 16:00 sun plaza de dlieja, lascé cuncé si roda.
Granc y pitli possa purté si roda per la lascé cialé do y la njenië ca a puntin per furné segur a scola y al lëur – dut debant. Lecurdon che l ie de gran mpurtanza furné tl scur cun lumes linëuses, per vosta segurëza y chëla di autri. Unide duc a fé n check-up per vosta rodes – debant!

Festa dl pan
Por le pröm iade a Badia, vëgnel tigní dai 5 ai 7 de setëmber deplü incuntades liades al pan
Dai 5 ai 7 de setëmber vëgnel tigní la festa dl pan, tl raiun da La Crusc a Badia. Al é na festa dedicada al pan y ales tradiziuns de nosta valada. Zacan êl la usanza che la familia da paur se fajô instëssa le pan che ara adorâ. Sön i lüsc da paur gnôl fat pan dui iadi al ann, n iade da d’aisciöda y n iade da d’altonn. I dis gnô chiris fora avisa y valutá aladô dl tëmp y dles stëres. Pornanche an â fat fora le dër de, gnôl arjigné ca döt ci che an adorâ, adöm cun tröpa farina, ega ciöbia, se, anes y ciarí gnôl moscedé adöm le lové y fat cun gran fadia na pasta. En ocajiun dla festa dl pan sarál le vëndres ai 5 domisdé na escurjiun cun Helga, esperta de erbes de medejina, y vijita al vedl morin dl lüch da Alfarëi. La sabeda sarál dales 18:00 na sëra de cunties, tradiziuns y n pice aperitif tla ütia »L’Tamá« a Badia. La domënia ai 7 podará düc ciarcé spezialités duces y sarades liades al pan, tles üties L’Tamá, Lé, Nagler, La Crusc, Ranch da André y pro le lüch d’Alfarëi. Le de vëgn acompagné da intratignimënt musical y laborators sura le pan por pici y gragn.

Proiet musical: Soundwave Project
Adöm orunse vire y trasmëte les emoziuns liades ai gragn conzerc de musiga dal vi
I organisadus, ciantarins y mu­sizisć dl Sound­wave Project inviëia a süa cuarta ediziun ispirada ai gragn conzerc y de­dicada ales gran emoziuns dla musiga dal ví. En chësc ann sarál sön paladina adöm ai cian­tarins, ala band y brass band, ince na orchestra.
Le repertore che sará da aldí é dër rich y se porta da gragn hit dl tëmp passé a toc plü nüs, por avëi na cercia adatada a vigni gust musical. 
I conzerc vëgn tignis en jöbia ai 4, sabeda ai 6 y domënia ai 7 de setëmber dales 20:30, tla Ciasa dla Cultura a La Ila. Les prenotaziuns vëgn tutes sö tres internet ala misciun: https://linktr.ee/SoundWaveProject o al numer 378 0933314 dales 17:30 ales 19:00.