La Usc di Ladins

L’Alta Badia festejëia l’ann nü cun deplü manifestaziuns
Les scores de schi dl’Alta Badia organisëia deplü raic a val cun i chentli y en San Salvester él söl progam na festa te plaza te deplü paisc dl’Alta Badia
Tl’Alta Badia mët man les manifestaziuns por stlü jö l’ann 2025 ai 30 de dezëmber: a Calfosch él la scora de schi che organisëia dales 16:30 n rait a val cun i chentli por mituns, a chël che düc é inviá a tó pert. Dales 17:00 sarál i maestri che vëgn jö cun i schi y i chentli y i stödafüch organisëia la lotaria cun musiga. La manifestaziun vëgn stlüta jö cun n spetacul de löms laser.
Ince a San Ciascian vëgnel metü a jí da pert dles scores de schi n rait a val cun i chentli ai 30,12.: pro la pista »Armentarola« dales 17:00 cun la Scora de Schi Dolomites y sön la pista »Piz Sorega A« dales 18:00 cun la Scora de Schi da San Ciascian, a chëra che düc po tó pert se scrion ite pro la scora de schi. Denant che pié da Piz Sorega jö, él la poscibilité da se mangé na jopa; la manife­staziun vëgn abelida da musiga dl DJ y al gnará dé fora vin cöt jödapé dla pista.
En San Salvester al 31.12. podará düc i interessá tó pert al rait a val cun i chentli sön la pista »La Crusc1« a Badia. An pëia ia dales 17:30 y al ne manciará sambëgn nia musiga cun le DJ y val’ de cialt da bëre jödapé dla pista. Por tó pert al rait mësson se scrí ite pro la Scora de Schi de Badia. La nöt de San Salvester pó gní festejada te plaza a Corvara, a San Ciascian y ince a La Val olache al sará n DJ che se crüzia dl intratignimënt musical. Pro dötes trëi les festes vëgnel dé fora val’ da bëre y ares mët man dales 22:30.
Bëgngnü 2026
Le paisc da Corvara ti dá le bëgngnü al ann nü cun n spetacul al 1 de jená 2026 dales 21:00 sön la pista »Col Alto«. La Scora de Schi da Corvara–Ladinia organisëia n rait a val cun i chentli y deperpo gnarál ince ilominé le Sassongher. Ala fin vëgn la manifestaziun abelida da n spetacul de löms laser. N DJ se cruziará dl intratignimënt musical tratan la manifestaziun.

Spetacul söi schi

• 
•  

View the embedded image gallery online at:
https://www.lausc.it/manifestazions-y-evenc/31012-manifestazions-atuales-speziales#sigProIded3335b9ac

cun dötes les scores dl’Alta Badia
En lönesc ai 5 de jená 2026 se presentará dötes les scores de schi dl’Alta Badia te n spetacul sön i schi sön la pista Doninz a La Ila
Sön la pista Doninz tl zënter da La Ila vëgnel tigní en lönesc ai 5 de jená n spetacul söi schi da pert de dötes les scores de schi dl’Alta Badia. Bele te chisc ultims agn él gnü metü a jí na serada de animaziun particolara, metüda adöm da dötes les scores. Le spetacul, che é caraterisé dala tematica dles Olimpiades, mët man dales 21:00 y an podará amiré deplü disciplines sportives che vëgn dant pro i jüc olimpics. Sambëgn ne pó nia mancé le rait a val tradizional cun i chentli. Le grup de jogn dl »Pirates Freestyle Team« mostrará sü salc y acrobazies tl’aria. N spetacul rich de adrenalina y che liëia düc i maestri de schi dl raiun dl’Alta Badia. Düc é dër bel inviá da tó pert ala manifestaziun.

Conzert da Nadé cun le »Quadriga Consort«
Badiamusica inviëia a conzert, en mertesc ai 30 de dezëmber dales 20:00, te gran salf a La Val
»Darkness Falling« é le ti­tul dl conzert da Nadé che Badia­­musica mët ai jí ai 30 de de­zëmber. Al sará da aldí le »Qua­driga Consort« cun So­phie Eder (usc), Angelika Huemer (fabló, viola da gam­ba), Karin Sill­dorff (fabló), Dominik Teu­fel (viola da gamba), Philipp Comploi (basse de violon), Tobias Stein­berger (percu­sciun) y Niko­laus Newerkla (direziun, cem­balo, vibran­doneon, aranja­mënc y com­posiziun). 
Le grup portará dant musiga dales isoles bri­taniches.

Alpaca e èrt se entrecia su la Andes
La mostra-marcià di lurieres fac te la miscions de l’Operazione Mato Grosso é averta a Poza dai 27 de dezember ai 6 de jené
Rua endodanef te Fascia la esposizion di lurieres fac a man da la femenes ti »taller«, i laboratories enjigné da l’Operazione Mato Grosso te la miscions de l’America del Sud. L obietif del OMG l é ge ensegnèr n mestier a la jent che vif su la Andes e ge dèr n marcià a sia produzion percheche la posse viver e aer n davegnir te si paijes e no la cogne se n jir te zità olache de spes la troa demò meseria. Te la mostra »Alpaca e èrt« se pel troèr maies, guanc, tapees, recames e auter; la vegn metuda fora per endrez de la sociazion Don Bosco 3A de gra al lurier de n muie de volontadives che da la Tèlia deida chi che laora te l’America del Sud. La mostra resta averta dai 27 de dezember ai 6 de jené a Poza, te la veia scola populères te Strada di bagnes 10, con orarie 9:30-12.30 e 15.00-19.00.

Casperle vën a nes crì tl Museum – n devertimënt per pitli y granc!
L Museum Gherdëina nvieia de cuer a na reprejentazion dl Casperle, l teater de mariunëtes tradiziunel tla rujeneda ladina, cun Christine Walpoth
Tla mostra nueva »Dal lën al juech – Sevi ora per l mond« tl Museum Gherdëina saràl da udëi chësc spetacul per pitli y granc, che garantësc devertimënt cun umor, mujiga y persunajes da culëur. 
La manifestazion ie n sada ai 3 de jené 2026 dala 10:30 y ie adateda per families, mutons y per duc chëi che s’la rij gën!
Priejes: 16€ Azion familia (2 granc cun mutans y mutons sot a 16 ani);
8€ Azion minifamilia (1 grant cun mutans y mutons sot a 16 ani). La cherta vel per la vijita de dut l Museum! Duc ie nviei de cuer.