Por na copia che s’ó bun y che tol la dezijiun da jí le tru dla vita deboriada él forsc la maiú espresciun dl amur: la vita che dá inant la vita y al vëgn mituns docá. Deventé geniturs é na esperiënza che trasformëia süa vita, nia ma dal punt d’odüda individual y de chersciüda personala, mo ince tla vita de copia instëssa, che röia te na fasa nöia, liada a n gröm de ligrëzes, sciöche ince oblianzes, impëgns y desfides. An pó dí aporania che i mituns mët ince ala proa la vita de copia y por tan important che al sides che i geniturs sides chiló por i mituns, él altamo tan important che i partners se recordes da ester ince chiló danter ëi. Rodunt de chësta fasa importanta dla vita nen vára tl liber "und wir mittendrin
– Wie Eltern Nähe, Liebe und Verbundenheit als Paar bewahren". Chësc é le titul dla publicaziun nöia dada fora da siur Tone Fiung, assistënt spiritual dles families y da bun 25 agn incá ince consulënt por les copies. Ël á acompagné i pers tles fases desvalies dla vita, gonot ince chëres plü critiches, y á porchël ince odü ci desfides che l’ester geniturs comporta y ci che é important. Chësc liber nü, gnü fora tla ciasa edituria Athesia, é partí sö te sis capitui generai dla vita da geniturs deboriada, che vá spo ite te na linia de tematiches plü spezifiches, che vá dal tëmp deboriada al tëmp por se instësc, dala partiziun di co pic, de n amur fat danter dé y tó, de tematiches pratiches sciöche la chestiun di scioldi y l’adoranza dl smartphone y cotan d’ater. Le fí cöce che se desfira fora por le liber é tres indô... la comunicaziun. I un albü l’ocajiun da s’la cunté cun siur Tone y cuché ite impara te chësc liber nü.
La intervista cun siur Tone ciafëise t’La Usc di Ladins di 17 d’aurí (Intervista: Pablo Palfrader)
