La Usc di Ladins

Antermëia festejëia Sant Antone
En sabeda ai 17 de jená inviëia le Consëi de Cöra da Antermëia ala festa de Sant Antone abat, patron dla ciaussa y dla dlijia d’Antermëia. Domisdé gran batadú
Sant Antone é a Antermëia na festa sintida, pro chëra che al röia alerch ince tröpa jënt da foradecá, cis paurs y famëis che vëgn a se perié jö l’aiüt dl Sant por podëi passé l’ann nü zënza desfortünes a porsones, tiers y cosses. 
En sabeda ai 17 de jená ésera indô tan inant. Le Consëi de Cöra dl paisc inviëia ala festa, che mët man dales 9:00 cun la Corona te dlijia, y dales 9:30 sarál spo la mëssa da festa. Dedô vëgnel sorví val’ de cialt y düc ciafa n simbol dl Sant da taché söl guant. Al é ince la poscibilité da marné te salf dles manifestaziuns.
Dales 14:00 vara inant te salf cun le batadú cun de bi pesć y ola dla fortüna. Les prenotaziuns al batadú vëgn tutes sö al 347 1215547. Les entrades dla festa vá a bëgn dla dlijia.
Na vedla ert marziela te Gherdëina
N duman, sada ai 10 de jené, cumbaterà atlec da duta Europa a Puntives te una dla ertes marzieles plu vedles dl mond - l Muay Thai 
Ntan l di - senià da adrenalina y tecniches ma dantaldut da respet danter un y l auter - se sfiderà atlec y atletes per vëncer l ciol WMC MAD nternaziunel. 
L prugram scumencerà cun i prelimineres, dala 16:30 nchin la 18:00, dedichei ai talënc jëuni che vën do te nosc raion.
Dala 19:00 nchin la 21.00 jiràla inant cun la Main Card, che ie l avenimënt de majera mpur­tanza y ie resservà ai atlec amatëures y prufescionisć de livel nternaziunel. Chësta ndesfideda de livel plu aut vëija dant n titul de prestige: la atleta de cësa Bettina Gruber cumbaterà contra la atleta spanuela sterscia Nerea Rubio Camacho per l ciol WMC MAD nternaziunel.
Ne ve lascëde nia mucé chësta manifestazion, metuda a jì dala Hanuman Muay Thai Gherdëina tla palestra de Puntives. Per plu nfurmazions: info@muay-thai.it


Ert sön pista
Anter

• 
•  

View the embedded image gallery online at:
https://www.lausc.it/manifestazions-y-evenc/31044-manifestazions-atuales-speziales#sigProId4d5e0af3b5

La Ila y Badia gnarál cherié scoltöres de nëi dai studënc dla scora d’ert Cademia. Tema é »I Ladins, le popul dles Dolomites«
Tl raiun dai schi da La Crusc vëgnel metü a jí la cuinta ediziun de »Ert sön pista«, na manifestaziun che vëiga la nëi sciöche material por cherié scoltöres y ti dé espresciun ala creativité di artisć. Le concurs y la mostra dles scoltöres vëgn metüs a jí dai 12 ai 14 de jená y an podará odëi i studënc y ex–studënc dla scora d’ert »Cademia« de Urtijëi, che realisëia operes dan deplü üties dl raiun dai schi da La Crusc. 
Le tema dla mostra de chësc invern é »I Ladins, le popul dles Dolo­mites« y an podará amiré les operes tratan süa realisaziun mo ince fora por les edemes dedô jon cun i schi da La Ila cina a Badia. Dai 14 al 31 de jená él la poscibilité da chirí fora sön le profil Facebook y Instagram dl’Alta Badia l’opera che á plajü le plü. Plü informaziuns ciafon ti ofizi turistics dl’Alta Badia.