La Usc di Ladins

L’orchestra »Monteverdi« a La Ila
L’orchestra dl conservatore »C. Monteverdi« da Balsan tëgn conzert ai 29 de merz, te Ciasa dla Cultura a La Ila
En domënia ai 29 de merz dales 20:00 sarál da aldí tla Ciasa dla Cultura a La Ila l’orchestra dl Con­servatore »C. Monteverdi« da Balsan. 
L’orchestra, metüda adöm da passa 80 musizisć jogn dl con­ser­vatore, portará dant le con­zert por clavier y or­chestra op.16 de E. Grieg y la suite sinfonica »Šehere­zade« de N. Rimsky-Korsakov. Te chësta ocajiun gnarál ince soné l’opera »Motor road 2« dl componist Eduard Demetz.
Ert cun bozes de plastica
Ai 27 y 28 de merz él n curs tl studio Zona a Pedraces,

• 
•  

View the embedded image gallery online at:
https://www.lausc.it/manifestazions-y-evenc/31482-manifestazions-atuales-speziales#sigProId8b68d36327

cun Cristinarosa Pizzinini
L’EPL – Ert Por Ladins inviëia a n curs por imparé da fá ciüfs, fëies, festies (»steli«) y bocá cun bozes de plastica. Le curs vëgn tigní tl studio Zona a Pe­draces, le vëndres ai 27 de merz dales 15:00 ales 19:00 y la sabeda ai 28 de merz. dales 9:00 ales 17:00.
Por le curs él da se tó para na forfesc por les aundles y öna normala, n valgönes bozes de plastica cun stoplun. La sabeda pón ince se tó para na picia marëna; n tê se fajarán söl post. Les prenotaziuns vëgn tutes sö al numer 345 3966674 o ala misciun e–mail pizroc@icloud.com. Le cost dl curs é de 75,00 € a ce.


Gara por le »Re dla Falda«
Te na gara dër particolara, cun percurs danter portes y ostacui, gnarál incoroné le Re dla Falda. L’apuntamënt cun le telemark é en mercui ai 25 de merz da sëra, sön la pista Doninz-Gardenacia a La Ila
Düc i amisc dl telemark, prinzipianc y pro­gredis, simpatisanc y nia, é inviá ala festa dl telemark »La Falda«, en mercui ai 25 de merz dales 20:00 ales 22:00 sön la pista Doninz-Gardenacia a La Ila. Te chësta ediziun d’La Falda gnarál incoroné le Re dla Falda – le telemarcher plü asvelt dla serada. An fajará la gara classica a tëmp: dal mëteman messará le concorënt sburlé por fa na gran ota, dedô trá n salt olache le concorënt ará da arsí en telemark (na juria valutëia la dërta posiziun, zënza él penalités). Ara vá inant cun le rové la gara indô sön n percurs de portes. L’elm é obligator. La gara é debann. Do la gara vára inant cun n pice party tl restorant pizzeria La Bercia a La Ila. Informaziuns sot a info@uslaila.it o por WhatsApp al 329 8627658.
L’importanza dl lingaz dl corp
Le Consëi de formaziun Badia organisëia n seminar cun Barbara Schnitzer, ai 27 de merz domisdé a La Ila
Co funzionëia pa la mimica, i gesć y la usc? Chësc pón gní lassura tl workshop cun Barbara Schnitzer, che sará en vëndres ai 27 de merz dales 15:00 ales 18:00, tl salf panoramich dla Ciasa dla Cultura a La Ila. Te chësc semi­nar impararaste sciöche to com­porta­mënt ti confrunc di atri é plü sterch co les parores. 
Te impararas da adoré cun co­sciënza le lingaz dl corp, l’espre­sciun dl müs, i gesć y la usc por aparí sigü, da orëi bun y compe­tënt. Les preno­taziuns vëgn tutes sö anter i 24 de merz ala mail cf.badia@rolmail.net . Le cost dl seminar é de 25,00€ a ce.


Film documentar »Fossa Santa«
Invit ala presentaziun dl n film documentar »Fossa Santa« de Paolo Vinati, en mercui ai 25 de merz dales 18:00, tl salf dles manifestaziuns a Calfosch
Le film documentar de 15 menüc cunta dl Sepol­cher Sant che vëgn metü sö vigni ann tla dlijia da Calfosch: na scenografia, fata tl Otcënt, dër preziosa dal punt d’odüda storich y artistich, che rapre­sentëia scenes desvalies fora dla Pasciun de Gejú Crist. La presentaziun vëgn adaldé cun na intro­duziun storich–artistica de Danila Serafini, che nes spligará l’iconografia dla dlijia da Calfosch. Dedô ván a vijité le Se­polcher Sant.


Sostëgn bunorí por families
Ester geniturs – löm y ambria; insciö sciöche i sun, vara bun y canche i me stënti, me chiri aiüt. Chësc é le slogan dl Sorvisc de Sostëgn bunorí por families. Proscima incuntada a Picolin ai 23 de merz
Al é n sorvisc por düc i geniturs che vëgn docá, geniturs susc y families cun mituns danter 0 y 3 agn, che é te situaziuns de desfida. En particolar vëgnel pité: sostëgn ales families te de ries situaziuns; soluziuns por smendrí le stres familiar; al vëgn ponsé a strategies desvalies svilupades adöm por ciafé soluziuns; renforz de döta la familia; düc i mituns dess avëi les medemes poscibilités; al dess gní realisé cosses tignon cunt dl cheder complet por sostigní la familia.
Nüsc esperc dl ciamp sanitar y sozial dá consëis aladô dles ghiranzes y ciafa deboriada soluziuns adeguades. Le sorvisc é debann, confidenzial y volontar. Por plü informaziuns podëise se lascé adintëne al numer 333 6203945 o ala e–mail fruehe.hilfen@bzgpust.it
Le sorvisc se incuntará tl’alzada a tera dl raiun soziosanitar Val Badia, te chëstes dates: 23 de merz, 20 d’aurí, 18 de ma, 15 de jügn, 27 de messé y 17 d’agost.


Teater »Le jüch«
L’Uniun Teater La Val EO porta sön paladina la comedia »Le jüch«. Set compagnes y compagns. Na cëna. N jüch che müda döt…
»Le jüch« é les stories de set compagnes y compagns che se incunta a cëna y se fej fora da mëte i fonins sön mësa, da lascé ascuté para vigni telefonada y da lí dant vigni messaje che röia adalerch. Le teater é basé sön le film »Perfetti sconosciuti« de Paolo Genovese. Al é n toch atual, plëgn de situaziuns da rí, mo ince momënc emozionai – n toch che fajará dessigü ponsé do y baié tröp.
La premiera é incö vëndres ai 20 de merz dales 20:00; les atres rapresentaziuns é la domënia ai 22.03. dales 20:00, mercui ai 25.03. dales 20:00, sabeda ai 28.03. dales 20:00 y domënia ai 29.03. dales 18:00, dagnora te salf dles manifestaziuns da La Val. 
Prenotaziuns tres Whatsapp al 340 8951293 o 333 4616848, o por telefon dales 18:00 ales 21:00.