La Usc di Ladins

»Ciastel de Tor: Families y descendënzes«
Le Museum Ladin Ciastel de Tor á le plajëi da Ves invié ala presentaziun dl liber de Irma Trebo, en sabeda ai 9 de ma dales 11:00
Le liber é na inrescida genealogica dles döes families Trebo y Zingerle de Tor a San Martin, cun na odlada interessanta te süa storia. 
L’auturia Irma Trebo, instëssa nasciüda y cher­sciüda sö tl Ciastel, á cherié na publicaziun che nes cunta olache les descendënzes dles döes families é tla spana de 200 agn indlunch rovades.
Dales 11:00 él la presentaziun dl liber, dales 12:00 n pice renfrësch y dales 13:00 él söl program vijites menades fora por le ciastel, cun testemoni dl tëmp – por ladin y por todësch. Les vijites é debann.
La merscia di Jüc Olimpics a Cortina
Na mostra de fotografies tl Istitut Ladin tematisëia sciöche i Jüc Olimpics de Cortina á trasformé le teritore, cun fotos dl 1956 y 2026. La daurida é ai 15 de ma
En vëndres ai 15 de ma dales 18:00 él tl Istitut Ladin a San Martin de Tor la dau­rida dla mostra »Il terreno dei Giochi – costruire le Olimpiadi, trasformare il terri­torio«. Fotografies fora dl Archif sto­rich fotografich Zardini vëgn metüdes fora cun fotografies de Cortina d’aldedaincö, y nes inviëia a na reflesciun sön le svilup y le mudament de nüsc paisc y de nostes munts. La mostra sará spo daverta dai 16 ai 24 de ma, vigni de dales 10:00 ales 12:00 y dales 15:00 ales 19:00.

»31,1246667«
L’EPL mët fora tl Tublà da Nives te Sëlva na coletiva, le titul é tut dla spersa de 31,1246667 m2 che vigni artist:a á a desposiziun
L’assoziaziun culturala y lerch espositiva Tublà da Nives te Sëlva inviëia a na mostra de grup dl’uniun culturala y artistica EPL-Ert por i Ladins dla Val Badia, seziun de ert figurativa. 
Le grup é metü adöm da David Brandlechner, Fabian Feichter, Franz lrsara, Gaia Lionello, Mattia Maldonado, Edmund Nagler, Maria Pezzedi, Giovanni Rindler, Roberta Sottara, Ursula Tavella, Brigitte Trieb y Jutta Valentini. La mostra sará da odëi dai 16 de ma ai 11 de jügn 2026, cun la vernissaja söl program ai 15 de ma 2026, dales 18:00.

Conzert d’aisciöda dla Müjiga Calfosch-Corvara
La musiga di jogn »The Groovy Wind Band« y la Müjiga Calfosch-Corvara sará da aldí en vëndres ai 15 de ma a Corvara
La Müjiga Calfosch-Corvara tëgn en vëndres ai 15 de ma le conzert d’aisciöda, sot la bachëta de Gerhard Mohr. Le conzert mët man dales 20:30 tl salf dles manifestaziuns a Corvara y sciöche da tradiziun podarán odëi por pröms sön paladina i musicontri jogn che sona pro la »The Groovy Wind Band«, sot ala direziun dl verdajogn Michael Pescolderung. 
Le conzert jará inant cun le program dla Müjiga Cal­fosch-Corvara, che porta dant toc tradizionai, mar­ces y pol­ches, mo ince melodies plü mo­dernes sciöche »Around the World in 80 Days« o »Far­mer’s Tuba« cun le solist Elias Mersa. Düc i amanc dla musiga é dër bel inviá da gní a d’ascuté sö le conzert y passé na serada en com­pagnia dles beles melodies.

Presentaziun dl liber »cesta gerla fagotto«
En jöbia ai 14 de ma dales 20:00, te biblioteca da La Ila, cun l’auturia Rosanna Cavallini
La biblioteca »Sas dla Crusc«, la Uniun Patrones Badia y le Consëi de formaziun Badia inviëia ala presentaziun dl liber »cesta gerla fagotto« de Rosanna Cavallini, en jöbia ai 14 de ma dales 20:00, te biblioteca da La Ila. Le liber cunta dles ëres che se spostâ por vëne patüc söles strades y chë­res che se spostâ por pité süa forza de laur. 
Tröpes ne marciadâ nia de bëgns, mo metô a de­sposiziun sües capazités, y deventâ pert de n fe­nomen de emigraziun de sajun che á segné dassënn la storia soziala de tröpes comunités. Tres inrescides storiches, testemonianzes diretes y cunties de vita ti dá l’auturia indô usc a chëstes ëres sön tru, bones da trasformé le bojëgn te opor­tunités.

Südtirol – nosta patria
Conzert tradizional d’aisciöda dla Musiga da San Martin de Tor, en sabeda ai 16 de ma dales 20:00 tl salf dles manifestaziuns a San Martin
La Musiga da San Martin de Tor á indô le plajëi da porté dant le program imparé ite ti ultims mëisc, en chësc ann sot al titul »Südtirol – nosta patria.« Sot ala bachëta de Katrin Zingerle podarán aldí melodies scrites da componisć de Südtirol cun val’ ciantia acom­pagnada dal Cor Usc o dal bel sonn di orghi da man. Le conzert mët man cun la fanfara »Jubiläumsfanfare« de Tobias Psairer, spo pón aldí l’overtüra dl jonn Jakob Augschöll »Red Anchor«. Ara vá inant cun la suita te trëi perts »Dolomitensagen« de Sepp Thaler. La pröma pert gnará stlüta jö cun »The Olympic Theme« scrita dal gherdëna Giorgio Moroder. La polca de Armin Kofler »Die schönsten Jahre« deura la secunda pert. I jarun spo inant cun dui toc dl conesciü Herbert Pixner: »Sommer­nachtswalzer« y »Der Russische«. 
Ala fin aldia­rán ciamó »Freetime – Music« de Gottfried Veit y »Emotionen der Heimat« de Franz Rieder, ar. Matthias Rauch. Düc i mëmbri dla Musiga ves inviëia cun gran ligrëza a passé na sëra cun de beles melodies. I ves aspetun cun gran ligrëza!