La Usc di Ladins

Mostra–Paradeiser
Tla galaria Vijion a Puntives iel da udëi la mostra dal titul »Paradeiser«. La giaurida ie n sada ai 12 de setëmber dala 11:00
L titul dla mostra »Paradeiser« fej referimënt ala parola storica dl mëil dl paravis. Tl zënter dla mostra ne n’ie l paravis nia na luegia de  retrata idilica, ma na luegia de trasfurmazion permanënta. L cërtl naturel di fruc te verzon che crësc y nfraidesc gëura truepa simbologies: l nascer y l passé, la cura y l ntervënt, la richëza y la perduda ie liei un al’auter. L verzon devënta nscila n cheder de n raport vif, te chël che i pruzesc ecologics, soziei y culturei se sëuraporta. »Paradeiser« ne ntënd nia l paravis coche luech perdù, ma coche model de vita sul mond, che se gëura al mudamënt y ala cunvivënza.
I artisć che mët ora ie: Julia Bornefeld, Florian Borkenhagen, Philipp Putzer y Mischa Sanders
La mostra fej pert dl prugram dl »Enes dl’Ert« dai 7 ai 20 de setëmber.
Giaurida: sada ai 12 de setëmber, dala 11:00 tla galaria Vijion a Puntives.
Orar: 07.09. – 29.09.2026 lun – sad dala 4 – 7 domesdì, o cherdan su l 3382098697.


La Berstot de Lenert – Die Kunstwerkstatt Lenert – La Bottega d’arte Lenert
Rudolf Moroder (1877–1914) & Ludwig Moroder (1879–1953)
Dai 19 de setëmber nchin ai prim de nuvëmber iel da udëi tla sala dla mostres dla Cësa di Cugresc a Urtijëi la mostra La Berstot de Lenert – Die Kunstwerkstatt Lenert – La Bottega d’arte Lenert. Rudolf Moroder (1877–1914) & Ludwig Moroder (1879–1953). La se dà ju cun la storia dla berstot dla familia Moroder Lenert y dantaldut cun l’opres di scultëures Rudolf Moroder Lenert (1877–1914) y Ludwig Moroder Mëune (1879–1953). La mostra ie na scumenciadiva dl Istitut Ladin Micurá de Rü y ie unida a se l dé n cunlaurazion cun l Museum Gherdëina, l Museum Ladin Ciastel de Tor y la lia La Vëta. L Chemun de Urtijëi, la Lia dl Turism de Urtijëi y la Provinzia autonoma de Bulsan-Südtirol la à sustenida.
La berstot d’ert Lenert fej pert dla storia dl ziplé y dl artejanat artistich te Gherdëina di ani danter l mudé dl secul dal 19ejim al 20ejim. Cun si storia ne dàn nia mé na udleda al’opres di prutagonisć, ma nce al lëur da uni di te berstot, ala furmazion di lerneri, al valor di dessënies y di modiei ntan l pruzes de lëur, sciche nce ala realisazion dl’opres per n cërtl de cumitënc che jiva sëura Gherdëina ora.
L pont zentrel dla mostra ie Rudolf y Ludwig Moroder, i doi artisć plu mpurtanc dla berstot d’ert Moroder Lenert. Tres scultures de lën, dessënies, modiei, fotografies y documënc va la mostra ite sun aspec de si furmazion y sun si opres. Tl medem mumënt mostrela su l svilup dla berstot y i mudamënc che fajova ora l ziplé te Gherdëina ti prims dejeneies dl 20ejim secul. N’atenzion particulera toma sun i vares de lëur – dala idea, al dessëni, nchin al lëur ziplà – sciche nce sun l lëur da uni di te berstot.
De gra ala cunlaurazion cun la lia La Vëta vën la raida storica tres l luech cumpleteda cun na udleda sun la furmazion da scultëur de al didancuei. Tla berstot dla lia ti mostra studëntes y studënc dl Lizeum d’ert al publich n valguna tecniches de lëur che i mpera ntan si furmazion y che i sà da adurvé. La y i vijitadëures possa nscila udëi coche l vën realisà na scultura de lën y mparé a cunëscer i vares y la massaria che ie debujën y che n’opra fineda ne possa nia mustré su.
La scumenciadiva fej nscila da puent danter la storia dla berstot d’ert Moroder Lenert y la furmazion di jëuni che se dà ju ncueicundì cun l ziplé. Sce n ti cëla ai atestac de lëur de n iede y ala pratiches de lëur de al didancuei vëijen ora defrënzes cun l passé di ani, ma tl medem mumënt ie chësc nce na sburdla per pensé do a tan de pëis che à l savëi y l fortl che vën dat inant per la tradizion dl’ert te Gherdëina.
N ucajion dla mostra iel unì ora nce n catalogh che va plu sot tla storia dla berstot y de si prutagonisć, de gra a si opres, documënc y a si fotografies storiches y auza ora tl drë orden si atività tl cuntest storich y artistich de Gherdëina.
La mostra vën giaurida ai 18 de setëmber 2026, dala 6 domesdì tla sala dla mostres dla Cësa di Cungresc a Urtijëi.


Cursc da nodé y de atletica
Badiasport á daurí les iscriziuns por la sajun nöia

• 
•  

View the embedded image gallery online at:
https://www.lausc.it/manifestazions-y-evenc/32492-manifestazions-atuales-speziales#sigProId0018e28a30

di cursc 2026/2027
Deplü é indô i cursc preodüs, le cost por vigni curs é de 220,00 Euro, les iscriziuns vëgn tutes sö tres le formular dla uniun che é da ciafé y scrí fora söl portal www.badiasport.org

Prinzipianc
Mitans y mituns
Badiasport organisëia indô n curs da nodé y atletica por prinzipianc (cun Cristina y Davide). Le curs vëgn tigní vigni lönesc domisdé tla nodadoia da La Ila y atletica vigni jöbia por la spana de tëmp otober cina ma.

Alenamënc
Mitans y mituns
Badiasport mët indô a jí cun otober alenamënc da nodé y atletica (cun Verena/Kathrin y Davide). Al vëgn insigné i stii lëde, spiné, arosch y delfin. Le training de atletica lisiera alza fora les capazités de coordinaziun y de condiziun, al vëgn ince insigné les formes de basa dles singoles disciplines de atletica lisiera. Nodé vëgn tigní vigni vëndres tla nodadoia da La Ila, l’atletica lisiera vigni jöbia por la spana de tëmp otober cina ma.

Nodé por adulc
Adulc
Cun otober mët indô man “Nodé adöm” – nodé por adulc, cun Verena. Al vëgn insigné i 4 stii lëde, spiné, arosch y delfin, y mioré la coordinaziun y la condiziun. Le curs vëgn tigní tla nodadoia da La Ila vigni mertesc por la spana de tëmp otober cina ma.
Al ne se trata nia de n curs por prinzipianc, porchël vëgnel damané les capazités de basa dl nodé.


Chi dl ’63 festejëia i 63
Ai 26 de setëmber vëgnel organisé na marëna por düc i nasciüs y les nasciüdes dl 1963 dla Val Badia
»Nos dl 63 festejun i 63 agn«: chësc é le motto dla incuntada che vëgn tignida por dötes y düc chi che é nasciüs dl 1963 dla Val Badia.
L’apuntamënt é por i 26 de setëmber tl »Rifugio Capanna Nera«. An s’incunta dales 12:00, olache al sará la marëna cun intratignimënt musical. Al é da se scrí ite, paian le contribut de 100,00€ sön le cunt IBAN IT61A 08010 58341 000401418734. Informaziuns ciafon ai numeri 335 1409093 o 335 6235003. Poscibilité da parché él pro la plaza dl golf a Corvara.


Fusties: mostra de Laurenz Stockner
N vënderdi ai 11 de setëmber dala 19:00 iel la giaurida de na mostra nueva tl Tublà da Nives te Sëlva
La mostra pieta n’udleda al lëur de Laurenz Stockner y si ani de nrescida n cont di materiai, laurazion y trasfurmazion. Tl zënter iel la forma archetipica dl cop, che l artist lëura ora for inò da nuef te materiai desvalifs, ram, acel y pelter. Dantaldut l ram de Predoi, che l artist dlëiga y lëura ora nstës, lieia adum pruvenienza, artejanat y tëmp. Ti sënies de si laurazion vëniel ala lum storia y trasfurmazion dl material. Danter pëis y lesirëza, stabiltà y elastizità nàscel scultures che pierd si funzion uriginela y porta la udleda sul material nstës.
La giaurida dla mostra ie n vënderdi ai 11 de setëmber dala 19:00. La ntroduzion ie de Katherina Perlongo.
Buffet: Hotel La Pineta
La mostra resta davierta nchin ai 11.10.2026 uni di, ora dl lunesc, dala 16:00 ala 19:00. La mostra fej pert dl prugram dl’Enes dl’Ert.


Ester geniturs – löm y ambria
»Insciö sciöche i sun, vára bun, y canche i me stënti, me chiri aiüt«, chësc é le slogan dl Sorvisc de Sostëgn bunorí por families
Al é n sorvisc por düc i geniturs che vëgn docá, geniturs susc y families cun mituns danter 0 y 3 agn, che é te situaziuns de desfida. En particolar vëgnel pité: sostëgn ales families te de ries situaziuns; soluziuns por smendrí le stress familiar; al vëgn ponsé a strategies desvalies svilupades deboriada por ciafé soluziuns; renforz de döta la familia; düc i mituns dess avëi les medemes poscibilités; al dess gní realisé cosses tignin cunt dl cheder complet por sostigní la familia Nüsc esperc dl ciamp sanitar y sozial dá consëis aladô dles ghiranzes y ciafa deboriada soluziuns adatades. Le sorvisc é debann, confidenzial y volontar.
Por plü informaziuns podëise se lascé aldí pro chësc contat: tel. 333 6203945, e-mail: fruehe.hilfen@bzgpust.it Le sorvisc sará a desposiziun tl’alzada tera dl Raiun sozio-sanitar Val Badia en lönesc ai 14 de setëmber 2026 dales 8:30 ales 11:30.

Munts dl altonn
Dai 13 de setëmber ai 3 de otober vëgnel metü a jí tl’Alta Badia l’iniziativa »Munts dl altonn« cun n program de escurjiuns, incuntades y ativités por descorí les munts y sü corusc
Por la fin dla sajun da d’isté vëgnel metü a jí sot al inom “Munts dl altonn” n program de escurjiuns y esperiënzes partides sö te trëi liví de altëza: tla val, fora por i pra y plö alalt sön les pizes de nostes munts. Pro le livel plö bas él söl program na cercia de vins, na escurjiun por imparé a conësce les erbes da munt, n curs da cujiné, na marëna dedicata ala bla y öna ales erbes y na roda fora por le Tru di Artisć. Tl livel mesan vëgnel pité deplü escurjiuns ti parcs naturai, öna cun na geologa sciöche ince öna cina sö La Crusc y ince n’incuntada liada al ciajó te na ütia dl raiun dl’Alta Badia. Sö alalt pón jí cun n mënacrëp a fá döes vies ferates o descorí le vedl tru di iagri. Dötes les informaziuns söl program ciafon sön la plata internet o ti ofizi turistics dl’Alta Badia, olache an pó ince fá les iscriziuns por tó pert ai apuntamënc.


Emoziuns danter munts y vals
Le Fotoclub Val Badia inviëia a na serada de proieziun fotografica cun André Terza en jöbia, ai 17 de setëmber 2026, dales 20:30, te Salf dl Istitut Ladin Micurá de Rü a San Martin de Tor
André Terza, apasciooné de fotografia, dij: »Vigni iade canch’i sun alaleria, sc’i feji na spazirada o vá sö por munt o a fá jö, descëda la natöra te me tröpes emoziuns. Bele da pice insö y plü tert cun l’aparat da fá jö ái imparé da odëi tres indô danü les piceres y gran morvëies, dan porta, fora por les contrades o sö por i crëps. La natöra se scinca tan de forzes por nosc vire da vigni de, sce i ti portun respet y se tolun cura dles ferides, gaujades dales porsones.«


Curs de fotografia por prinzipianc
Davert a düc y dötes chi che oress scomencé cun la fotografia o oress imparé da la conësce miú
Le curs gnará tigní dal referënt Samuel Debon en sabeda ai 17 de otober 2026, dales 10:30 ales 12:00, tla Aula Magna dla Scora elementara de Badia, y é spartí sö te döes perts. Chëra teorica tl mëteman, olache an impara les bases de co adoré n aparat da fá jö y les tecniches plü conesciüdes por cherié de beles fotografies; y chëra pratica dedô, olache an porvará fora deboriada döt ci che é gnü insigné cun l’aiüt dl referënt. I periun da ves tó para n aparat da fá jö, por chi che ne l’á nia vëgnel metü a desposiziun al plü dui aparac. Les iscriziuns pó gní fates tres e-mail a fotoclubvalbadia@rolmail.net o por telefon scrion al numer 377 260 8630. Al vëgn tut sö al plü 15 partezipanc. Tl caje de burt tëmp vëgn le curs sposté al de do. Partezipaziun debann. Organisaziun: Fotoclub Val Badia en colaboraziun cun le Consëi de Formaziun Badia.La muderazion fajerà Greta Langgartner.