La Usc di Ladins

Na storia de n'amezizia particulera tl cuer dla Dolomites: la stria dl Scilier Xantia julëssa julé tan gën deberieda cun duta l'autra stries danter i crëps dla Dolomites. Ma pra si ghernea iel zeche che ne buta nia. For inò tómela ju. Xantia ie tan descunseleda y l'autra stries la rij ora. Per fertuna ùrtela pona zachei che capësc cie che ti mancia y che ie nce a una de ti judé. 

Chësta ie la descrizion dl liber nuef "Xantia, la stria dl Scilier", che ie unit publicà da permò per gherdëina. L ann passà ie liber unit ora per tudësch, chëst ann de fauré per talian y śën tla rujeneda dl'oma dl'autëura Erika Nogler Kostner: "Muesse bën dì, l avëi per gherdëina, te mi rujeneda dl'oma, chël me fej bën la majera legrëza. Liejer la paroles per gherdëina me và scialdi a cuer. Gloria Soppelsa à ciancià dal tudësch y Ulrike Mairhofer à fat l letorat. L me sà che les à fat tan n bon lëur tulan ca de bela paroles y, coche dit, liejer per gherdëina ie per mé velch de speziel".
La ilustrazions à fat Evi Gasser. N con' de chësta oportunità àla dit: "L me sà scialdi bel a dessenië stories de stries, de lijëndes y de pitla criatures che viv tl bosch. Rengrazie Erika per chësta storia de marueia".

La ntervista cun Erika Nogler Kostner pudëis liejer tla edizion nueva de La Usc che vën ora n vënderdi ai 30 de utober.

Julia Lardschneider