La Usc di Ladins

Presentaziun dl »Calënder Ladin 2027«
Cun vernissaja dla mostra personala de Jutta Valentini
En vëndres ai 13 de novëmber dales 18:00, gnarál presenté a Badia/Pedraces, tl Studio Zona, l'ediziun nöia dl »Calënder Ladin 2027«. Lapró gnarál inaudé la mostra di laurs dla artista dla »pratica« nöia, Jutta Valentini d'Al Plan. Te chësta ocajiun gnarál ince venü le »Calënder Ladin 2027«.
La mostra sará da odëi spo cina ai 20 de novëmber 2026, vigni de dales 15:00 ales 18:00.

Fabrizio Bosso Jazz Quartet
I Jëuni de Mujiga nvieia a si terzo cunzert dla sajon, n mierculdi ai 11 de nuvëmber dala 20:00 tla Cësa di Cungresc Luis Trenker a Urtijëi
Cun l cunzert «Routes» prejënta Fabrizio Bosso n pruiet nuef che mët tl zënter l dialogh, l jazz coche cultura che se muev for inant, passan tres tradizion y mujiga cuntemporana.
L cuartet – metù adum da Fabrizio Bosso ala tumbrëta, Julian Oliver Mazzariello al tlavir, Tommaso Scannapieco al contrabas y Nicola Angelucci ala bataria – chier stredes nueves, sburdlan la grupa de viers de raions sonores for plu y plu davierc. La tumbrëta de Bosso se muev cun na gran lidëza d'esprescion, danter i ujes di gran maestri y na nrescida timbrosa dassënn persunela y cuntemporana.
L cunzert se svilupea sciche n lëur ulache uni nota, uni solo, ne n'ie mei na azion sëula, ma n juech coletif.

Prejentazion dl liber SIDAMILU
L liber per mutans y mutons de Miriam Vinatzer y Ulrika Mauroner vën prejentà tla biblioteca de San Durich a Urtijëi, n juebia ai 12 de nuvëmber dala 15:30
Sidamilu ie na balena che viv te n luech tl'America dl Sud, sot al Ecuator. N di iela amaleda y la scumëncia a fantajië. Te si fantajia pëiela via, per abiné l ciof che ti dà la forza per varì...
Unide duc!

Conzert de Santa Zezilia
Le conzert anual dla Müjiga da La Ila vëgn iniann metü a jí la sabeda ai 14 de novëmber dales 20:00 tl salf dles manifestaziuns tla Ciasa de Cultura a La Ila
Al gnará porté dant toc fora de n repertore de varieté. Le conzert gnará daurí dal grup di musicontri jogn dl paisc »Mini Beat Band«, metü adöm aposta por l'ocajiun. Le grup sonará ciamó deboriada cun la Müjiga da La Ila denanche i lascé le palch por le program dla serada. Sot ala bachëta dl dirighënt Konrad Tavella y de Armin Valentini, gnarál soné toc de componisć desfarënc conesciüs y che é jüs tla storia dla musiga, sciöche toc plü moderns. La Müjiga da La Ila cun so dirighënt Konrad Tavella y le presidënt David Bernardi, inviëia de cör düc da gní a d'ascuté sö le conzert de Santa Zezilia.

Te berstot cun nëine y lava
N sada 14.11 pëia via na lingia de sades, te chëles che la berstot de Doss gëura la portes ai nëinesc y ala laves cun si nepoc
L'idea ie de ti dé valor ala berstot che ie da for incà stata na luegia che lieia la generazions. Deberieda possa ëi mudelé, ziplé, depënjer ma nce fé ciauza, hechelné y dut chël che ti toma ite y che i ie boni de fé cun la mans. I possa gën nce tò pea lëures bele scumencei, da fé inant y finé. I cunselieres dla Vëta sarà iló per vel'cunsëi y l material ie ënghe a despusizion. L fin ie propi chël che i nëinesc y la laves posse dé inant n savëi o na ert mpue des­minceda. La berstot sarà davierta uni segonda sada dl mëns nchin ai ai 13 de merz dl 2027 for dala 9:00 ala 12:00.
Gën pudëis ve lascé nuté su sot al numer 389 5271000 ma nce passé mé nscila te bersot.
Terminns : 14.11.2026–12.12.2026–09.01.2027–13.02.2027–13.03.2027
Adres: Lia La Vëta–Berstot de Doss, Via Sneton 71/a–Urtijëi

Iö me ó bun
Simon Kostner fej tapa cun süa tournee a Porsenú tl teater Dekadenz ai 13 de novëmber
Diesc agn do da »Badiotten« y »Über Unverträglich­keiten und andere Haus­tiere«, röia l'atur y cabare­tist Simon Kostner indô sön paladina cun so ultim toch »Ich liebe mich oder vom (Un)­Glück, ein Gut­mensch zu sein« cun regia de Dietmar Gamper. Ara se trata de n monologh a mesa strada danter n caba­ret y n teater che condüj le publich te n monn de ironia, matades y intuiziuns demorvëia.
Do la rapresentaziun a Neumarkt, vá la tournee inant cun le proscim apuntamënt che gnará tigní a Porsenú, tl Teater Dekadenz. Les prenotaziuns pó gní fates tres la plata internet www.dekadenz.it, o la e–mail karten@dekadenz.it, o al numer 0472/836393.
Dedô él ciamó dui apuntamënc: ai 26 de novëmber a Balsan, tl teater Carambolage, y ai 15 de jená a Maran, tl Theater in der Altstadt.

Rait de San Linert
Ai 7 y 8 de novëmber vëgnel tigní a Badia la 26ejima ediziun dl Rait de San Linert dles valades ladines y de Südtirol
Le Rait de San Linert mët man bele la sabeda ai 7 de novëmber cun n conzert di grups ladins »Maria & Mark«, »Popcorner« y »Wisetime«, dales 18:00 inant, tla tënda dlungia la Ciasa J. B. Runcher a Badia, olache al vëgn ince dé fora da mangé. La domënia jará spo inant la festa cun la santa mëssa dales 9:30 tla dlijia de Badia y dales 10:45 podarán odëi la defilada da Pedraces cina a San Linert, a chëra che al tol pert plü de 100 ciavai haflinger y norics dles valades ladines y de döt Südtirol, che gnará spo benedis. Al sará ince deplü musighes y i grups dl bal popolar che abelirá la festa y an podará odëi i ciars infornis sö y güces, cun guanc da zacan. Sön pastöra da Jonorëis podarán ti ciaré dales 13:00 al spetacul dl »Oswald von Wolkenstein Ritt«, cun trëi scuadres che se mosöra te döes disciplines. La festa vá inant cun musiga dal ví tla tënda, olache al vëgn dé fora spezialités gastronomiches da pert dles uniuns di paurs, di stödafüch y dla musiga de Badia. La manifestaziun vëgn tignida ince sce al é bur' tëmp.