Tre otes a 'l Ospedà, inze el mes de otobre: par ra portiscion, par ra cultura, par ra devozion. Ra mesa vendres ai 30 de otobre, el medemo di de ra consacrazion, che 'l é stà del 1226. Ades se speta el libro: vorù e fato da r'Ulda, el ruarà par Nadà
«Inze chesta jeja 'l é ra storia de chesta comunità. L é ra storia de ra fede de chesta śente, che ra testimogna el parcé che inalora i fedeles i à menà ca legname e sasc, da fei su 'na jeja. Inalora no n'ea fazile». Don Ivano Brambilla, pioan de Anpezo, 'l à dito coscita a ra parsones che à vorù ese su a 'l Ospedà, par ra mesa che i à dito del vendres, ai 30 de otobre, el medemo di che 'l ea stà ra consacrazion, d'outon del 1226, cemodo che se pó lieśe su 'na vecia carta bergamina, che 'l é inze 'l archivio de ra Regola outa de Larieto.
Un outon a 'l OspedàSto an ra śente de Anpezo r'é śuda tre otes a 'l Ospedà: ra prima del śoiba, ai 8 de otobre, par ra portiscion de ogni an, a ra fin
de ra stajon de i laore in canpagna, su ra monte, inze 'l bosco. Chel di, anche se pioea, de alcuante i é moeste a pe da Anpezo, da ra jeja granda de San Iaco, e i é ruade fin a 'l Ospedà. Doi dis dapò, sabeda ai 10 de otobre, inze chera jeja s'à podù scotà un grun de parsones a parlà de storia, architetura, arte. Chesta ota ra śente r'é śuda par devozion, par śì a ra mesa, leada a ra storia. Chera jeja, dedicada a i sante Nicolò, Biajo e Tone abate, ancuoi r'é de ra Regola outa de Larieto, ra pi vecia de ra Regoles d'Anpezo.
«Se ra Regoles 's é nasciudes e 's laora par fei stà meo ra śente del paes, parcé inalora ai betù tenpo, sode, fadies, legname e sasc, par fei su 'na jeja, coscita indalonśe dal paes?» – 'l à domandà el pioan, inze ra so predica, canche 'l à dito mesa, aduna col pree anpezan don Andrea Constantini Ghea, pioan de Fodom e de Col de Santa Luzia, vegnù aposta in Anpezo.
De plu tla edizion stampeda de La Usc di Ladins o sun l e-paper a paiament www.lausc.it/e-paper
