La Usc di Ladins

No una de più, i à dit adaut i studenc de la Scola auta de Fascia da la paladina de la Sorastanza, do che a scur, spartii fora te sala anter l publich, i à let ju un per un duc i inomes, l lech e l dì de la mort de la 85 femenes copèdes te la Tèlia dal scomenz de chest an 2025. N moment fon che à tocià tel vif l gran numer de jent che se à binà en mèrtesc ai 25 de november, tel Dì internazionèl contra la violenza su la femenes, per l event endrezà da la Scola Ladina col sostegn del Comun General de Fascia. Sun paladina, dutes regolèdes de neigher, la studentes de la seconda e terza liceo linguistich les à contà la storia vera de Aurora e Martina, endèna che sul vidrel jia fora la neva de la mort data dai Tg, e la stories enveze de eles, chest’outa con inomes enventé, che é states didèdes o che con sia forzes é states bones de se remir e de se destachèr da chi che ge fajea del mèl. Duta cantes a la fin à tout te man na resa checena, na resa che vel contèr na storia desvaliva, tanta reses per ge dir a la femenes che no les é soules ma che ensema les pel troèr la forza per denunzièr la violenzes e tor endodanef te man sia vita. La studentes é states compagnèdes te sia performance dal son douc de na chitara, sot la regia de la professora Silvia Murer che à coordenà dut l projet e l’ativitèdes.

Se pel lejer dut su La Usc nr 46 dai 28 de november, che se pel troèr ence te la boteighes de sfoes. Sul sit se per fèr l abonament al e-paper per aer azes vigni vender a dut l sfoi sul fonin, tablet o computer  (Monica Cigolla)