La Usc di Ladins

Cers amisc y benefaturs, i ves salüdi da Paguir tl Südsudan, olache i sun sëgn do les gran rogossies che nes á atoché de setëmber dl ann passé, y che nes á sforzé da arbandoné nosta misciun de Old Fangak, che é gnüda sopolida daldöt dal’ega.
Na pert dla diga é jüda a dezip por gauja dl inalzamënt dles eghes dl Nil. La diga á dé do, do che i volontars dla comunité â porvé döes ores alalungia da cuncé fora na sfënta. L’ega é defata rovada te cité, sforzan la jënt da se porté al sigü sön i tëc y sön les sperses plü alalt. Ince nos sun jüs sön tët de nosta ciasa y i un ciaré da salvé nostes cosses personales y mangiaria, aspetan da gní evacuá.
La bona noela é che la diga é gnüda cunciada, mo al orará ciamó ester so tëmp denanche le terac ciüces sö döta l’ega. Les autorités dl post ó adoré pumpes a motor por desmandré ega y fá a na moda che l’ega tires ite plü saurí. Al é n grandiscim laur che se damana l’aiüt y la cooperaziun de tröpes porsones, porchël sarál dër rî che i podunse jí zoruch defata tla vedla misciun.
Canche i sun rová a Paguir, nes ái metü a desposiziun döes de pices üties, che ne tlecâ sambëgn nia por nos miscionars y por les cosses che i ên stá bogn da mëte a saul. Bel plan, cun l’aiüt de tröpa jënt de bona orenté, unse tut material dl post sciöche lëgn, paltan y erba y i un fat sö üties por nos miscionars, na ciasadafüch, na refeziun, n magazin, na latrina y i un assighé ite döt cant por la segurté. Do cin’ mëisc s’unse lascé jö bun y cun döt che al é abitaziuns dër scëmples, ne podunse nia baudié. I un ci che i adorun y chëra é la cossa plü importanta. Lapró él vigni de val’ ëres che vá pro vistí a do ega da bëre, i un na cöga che cujina por nos y i un incër nos ia tröpa jënt che nes ó bun y che ne se lascia mancé nia. 

Döta la lëtra de siur Stefano ciafëise t’La Usc di Ladins di 20 de forá