La Usc di Ladins

Danter Longega y Al Plan, plü avisa danter Framacia y Mantëna, vëgnel chisc dis lauré por taié y desgorje lëgns sura la strada provinziala sö. Lëgns che vëgn mená demez ince cun le joler. Al é un de chi posć olache al é tres indô gnü jö val’ - can rames, can peres, can val’ de maiú. Chësta jöbia incër mesa dales 9 él sozedü ci che ne podess nia sozede. N lëgn é raité jö te strada y ti é rové ados a n auto che gnô da Longega söpert. Le stödafüch d’Al Plan Michael Call, che á coordiné l’intervënt, nes spliga che al é döes verjiuns dl sozedü: öna dij che le lëgn ti é diretamënter tomé ados al auto; l’atra che le lëgn ê bele te strada y le ciafer é salté laite adurbé dal sorëdl. Chi che passa plü gonot iló sö, sá che da chësta sajun pó le sorëdl ciamó bas davëi limité dassënn la odüda. Le resultat ne se müda indere nia: le lëgn é rové te strada y le ciafer é resté ferí al ce; ara se trata de n ël de 76 agn. Por na sigüda él gnü cherdé ince le dotur d’emergënza che á porté les prömes cures; dedô é le ferí gnü condüt te ospedal cun l’ambulanza dla Crusc Blancia d’Al Plan. Söl post êl bele dal mëteman rové i Stödafüs d’Al Plan cun 9 omi, che á albü le compit da saré jö le raiun, daidé tratan l’intervënt y dedô da desgorje le lëgn y romené sö. Da pert dles forzes dl ordin él gnü i Carabiniers da Bornech, che ará sëgn le compit da inrescí de un n vers la dinamica dl inzidënt y dl ater vers ince tlarí les responsabilités di lauranc y dla dita – sce al é gnü tigní ite dötes les normes y i provedimënc de segurté.
Michael Call di Stödafüs d’Al Plan dij a vigni moda che le problem de lëgns o material te strada é dër presënt, sides danter Al Plan y Longega, che suradöt danter Longega y Picolin: "Al é tan gonot che i gnun cherdá por peres, rames o lëgns te strada, dantadöt da d’altonn y da d’aisciöda, ti tëmps che al desdlacia, che al é ega o nëi. I baiun de strades provinziales. Chësc é n grandiscim prigo por la jënt che passa", dij Call, che se dejidrass finalmënter provedimënc por assiguré la strada daldöt, p. ej. cun n tonel da Longega ite.  (pablo)