La Usc di Ladins

I gregn apuntaments sportives del 2020 i é stac beleche duc sburlé al 2021, ma chesta paussa sforzèda no ferma la rodes te Fascia. Jà dò la fin del lockdown i ziclisć à endò scomenzà a bater la strèdes e i troes de Fascia, ma con i 27 de jugn la neva é amò miora per i pascioné de chest sport: à avert l FassaBike Park, che dèsc l met de śirèr su valgugn di percorsc più aprijié de la Enduro World Series. Chest sessaben ence de gra ai impianc portamont che à avert per l scomenz de la sajon, tel respet de la normes sanitères e de segureza.
Percorsc del BikePark, desche la cresta del Col Rodela, stata l’an passà proa del zircuit mondièl EWS, ma ence autra vies e soluzions che da Fascia porta te duta la Ladinia con la roda, desche l cognosciù Selaronda: »Per chi che à gust de far cheste esperienze – ne à dit Pamela Ghetta del Sport Check Point de Cianacei – se pel prenotar desche ogne an le vide FassaBike. Chest an, estra che le prenotar diretamenter te nesc ofizes de la val, se pel dorar ence la prozedura online, sessaben se l’é percorsc jà fac fora. Enlouta l ghest l pel veder sul sit la desponibilità di posć, ajache chest an aon l limit de portar n mascim de 5 persones con una vida, e paar jà sul sit. Se enveze l ghest l vel far na raida desvaliva l pel vegnir te ofize e dezider l tour diretamenter con la vida«.

Podede troèr l'articol entriech con duta la informazions su La Usc nr 26 stampèda ai 3 de messèl  (Daniele Verra)