Tennis: gran derby ladin

Data

30 de messel 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L derby ie mefun for l derby! Nscila fova l’ancunteda danter l TC Ladinia y l TC Urtijëi scialdi sentida. Venciù à la furmazion badiota.

N dumënia ai 12 de lugio iel unì cumbatù a Corvara per l prim post dl giron dl campiunat provinziel de Südtirol D4. La doi scuadres ladines ova i medemi ponc, do la ancuntedes cun l’autra scuadres dl giron.

La furmazions ufizieles
TC Ladinia: Capitan Achim Vinatzer, Kevin Vinatzer, Luigi Tasser, Massimo Nicosia y Franz Dapoz. TC Urtijëi: Capitan Davide Carrara, Marco Corriero, Giuliano Piccoliori, Alessandro Menotti, Roberto Silveri y Salvatore Polì.

Tlima dla gran ucajions
L tlima ie chël dla gran ucajions, l ie n tlima da derby. Bele tl scumenciamënt va ite sun ciamp l giuel jëunn Kevin Vinatzer, dessegur l miëur de duc, scebën che l ie propi mo jëunn. Nia da n fé per l dutor Piccoliori. Ladinia 1, Urtijëi 0. Per ti sté permez va per l Urtijëi sun ciamp l miëur de chëi de Gherdëina, Marco Corriero, che ti ie al capitan "badiot" Achim Vinatzer, te na partida scialdi trata che fina permò via cun l tie-break. Son nscila sun l resultat de 1 a 1. L Ladinia ie pona inò bon de fé n var inant, cun Luigi Tasser contra Alessandro Menotti. I doi se cunësc bele da plu ndesfidedes, i ie tecnicamënter dl medemo livel. Do na bela partida va l Ladinia inant sun l 2 a 1. Tl’ultima partida de singul, che resulterà pona dezijiva, se anconta Massimo Nicosia y Roberto Silveri te n match dut ntëur scialdi cumbatù. N va nce tlo al tie-break, la tenscion ie da pië cun man. Ala fin ie i patrons de cësa boni de fé mo n var inant, sun l 3 a 1. Gran festa da pert di tifosi badioc, chëi che se buova l café te bar. N va pona inant cun i dopli. Per l TC Urtijëi fej Davide Carrara cun Marco Corriero. I doi ti ie a Franz Dapoz y Massimo Nicosia, l Urtijëi vën inò ite n partida: Ladinia 3 Urtijëi 2. Tl ultimo match tómel la dezijion per l derby ladin. Per i patrons de cësa féjel Achim y Kevin Vinatzer, contra Giuliano Piccoliori y l "siculo-sican" Salvatore Polì. Danz che pere y mut Vinatzer ie massa boni. L derby ladin fina via cun la gran devënta badiota per 4 a 2. Iusta mo per la cronica: tramedoi scuadres fova bele dan l’ancunteda dl derby cualifichedes per i play off che sarà ala fin de agost, ieles pu ruvedes prima y segonda dl giron. L miëur dl di ie stat coche dit Kevin Vinatzer, scialdi jëunn y bele scialdi bon. Cumplimënc!

Davide Carrara

FOTO: Fotografia de grupa dl derby ladin. Gran ancunteda, ulache n à njenià ca dut a puntin, uni detail: monce i culëures dla bandiera ladina àn ulù fé udëi tl guant: vërt, blanch y brum!

Galaria retrac