L é ruà de bela sodisfazions tel ultim fin de setemèna per i balarins e la balarines di Pavei d’Arjent de Fascia, che i à tout pèrt a la competizions de la »Coppa dell’Amicizia«, ruèda a l’edizion numer 33, che é states metudes a jir dai 29 ai 31 de otober per endrez del Sport Club Meran.
Passa 200 atlec, jà selezioné per smendrèr l numer di partezipanc per la limitazions anti Covid, se à endesfidà al MaranArena, spartii fora te 8 categories.
Anter duc l ejit mior l é stat arjont dai doi bec fascegn te la pruma giornèda de garejèdes: Giovanni Pezzei se à vadagnà defat la medaa de or te la categoria Pre Novice de ic e Matteo Marchioni à arjont l medemo resultat ezelent te la categoria Advanced Novis.
La sabeda l é stat amò legreza per la sozietà Artistico Ghiaccio de Fascia e per la familia Marchioni. I Pavei d’Arjent defat i à portà a cèsa n’autra medaa, chesta outa de arjent, de gra a Martina, sor de Matteo. La balarina fascèna, con n program da marevea, la é stata bona de ruèr sul secondo sciaier del podie Junior de eles grop 3.
En domenia ence Emily Fosco é ruèda sul podie, desmostran de aer miorà n muie sie livel la se à vadagnà la medaa de bron te la categoria Pre Novice grop 2.
En ultima te la categoria Intermediate Girls grop 2 à garejà Andrea Martina Brunner, che l’à serà au sia competizion al 14° post.
N bel compliment a dutes e a duc i joegn atlec e a sia arcedadores e... a n’autra più bela!
(LG)
Matteo e Giovanni prumes a Maran
Ai 31 de otober i doi balarins fascegn é rué sul sciaier pià aut del podie de la »Copa de l’Amicizia«. Etres doi podies per i Pavei d’Arjent.
Galaria retrac
View the embedded image gallery online at:
https://www.lausc.it/sport/17632-matteo-e-giovanni-prumes-a-maran#sigProId4076b54fd1
https://www.lausc.it/sport/17632-matteo-e-giovanni-prumes-a-maran#sigProId4076b54fd1