La Usc di Ladins

Ai 24 de mèrz a La Thuile l é stat la garejèda de slalom strent de ic, che à portà l secondo òr nazionèl ladin de chisc campionac, con la venta de Stefano Gross da Poza, che se à vadagnà per la terza outa te sia cariera l titol nazionèl de slalom strent. 

Sabo, atlet de la Fiamme Gialle de 36 egn, l era jà doventà campion talian te la disciplina più tecnica del 2014 e del 2021. A La Thuile do la pruma manche Gross era al secondo post con demò doi centeisemes de destach da Tommaso Sala, e te la seconda manche l é stat bon de i recuperèr sorì se vadagnan coscita l prum post, ence de gra a na prestazion no otimala del poliziot valtelineis ruà tinultima 5°. Na bela sodesfazion per l atlet fascian che à desmostrà de esser amò bon de passèr via i concorenc più joegn.
L temp mior te la seconda manche l é stat chel del finanzier gherdener del 1999 Alex Vinatzer, che ampò l é stat bon de recuperèr demò una posizion, passan dal 5° al 4° post. A chesta vida l ge à lascià l post sul podie a n auter finanzier ladin, l badiot Matteo Canins, che l se à vadagnà la medaa de bron a 15 centeisemes dal sudtiroleis de arjent Simon Maurberger.

De più su La Usc stampèda de vender ai 31 de mèrz.

 (Lucia Gross)