La Usc di Ladins

Gnanca temperatöres frësches, plöia y i pröms floc de nëi sö alalt n’á tigní sö i atlec y i amaturs dl salté sö por munt che á tut pert ala nona ediziun dl »Delicious Trail Dolomiti«, des­ firada l’ultima fin dl’edema.

Fora por i percursc che passâ danter Cortina d’Ampëz, Pocol y l’Alta Badia, é passá n valgügn cënc de partezipanc da dötes les perts dl monn. Le 40% de chisc é gnü da foradecá por tó pert ala gara partida sö sön trëi percursc: le lunch cun 36,5 km che piâ ia dal zënter de Cortina, le mesan cun 34 km cun start a La Ila (Alta Badia) y le cört cun 21 km che metô man a Pocol.

Sön le percurs lunch de 36,5 km s’á metü a saul la devënta Lukas Mang­ger dal Ridnaun, che á stlüt jö la competiziun te 3 ores y 36 menüc, tratan che tla categoria feminila él sté Linda Menardi de Cortina d’Am­pëz a archité le cronometer a 4 ores y 39 menüc.
A taié por pröm le travert sön le percurs mesan de 34 km él sté Mauro Rasom de Fascia, che á stlüt jö le percurs te 3 ores y 15 menüc. Danter les ëres s’á porté a ciasa la devënta l’atleta Martina De Silvestro dl Cadore, che á batü la concorënza cun n tëmp de 3 ores y 38 menüc.
Sön le percurs cört de 21 km él sté n ater atlet dl Belun a rové por pröm al travert; chësc é Eddj Nani, che á stlüt jö la gara te n’ora y 51 menüc, y tla categoria dles ëres, s’á Natalia Mastrota da Milan porté a ciasa la devënta cun n tëmp de 2 ores y 22 menüc.


Deplü da lí sön la partezipaziun ala manifestaziun sportiva ciafëise da lí tla ediziun nöia de vëndres le 3 d'otober!