La Usc di Ladins

N sada ai 13 de dezëmber iesen furnei tl Vorarlberg per jughé a Dornbirn contra l EC Bregenzerwald. N'ena dant fova l HCG stat bon de vëncer contra chësta scuadra y nscila se ëssen aspità n juech daviert. Purtruep ne n'iela nia stata nscila.

L Gherdëina à metù man bën y ova tl scumenciamënt tla mans la partida. Ma l puc ie jit ite dala fauza pert. "Nce sce doi jugadëures dl Bregenzerwald fova oradejuech", coche à scrit l HCG sun si plata internet, ti àn cunzedù al patrons de cësa l 1 a 0 de Tim Bergströ tl sesto menut. Canche l fova dopro da jughé 4 contra 4 ie chëi de Gherdëina stac boni de fé l 1 a 1 cun Dimitri Vozovik, che ti ie passà via ai averseres "coche a stanges de slalom strënt" y à tucà tl cianton dla porta. Ma la ne à nia durà giut, che l ECB se à inò tëut tla mans l juech cun n colp sëch che l verdiaporta dl Gherdëina Matthias Rindone ne se ëssa nia aspità. La stajova donca 2 a 1. Do l 3 a 1 de Nico Kramer tl 13ejim menut, à l trainadëur dl Gherdëina Marcel Skokan baratà ora l verdiaporta: mpede Rindone àl metù ite Paul Hofer. Ma puec menuc do à l Bregenzerwald fat l 4 a 1 tl powerplay cun Toivo Laaksonen. Puec secunc dan la fin dl prim tëmp à chëi de Gherdëina trat ite l puc tla porta di averseres, ma l gol ti ie unì anulà.

Tl segondo tëmp pona la proscima sciacheda: l Bregenzerwald à fat tl 20ejim menut l 5 a 1 cun Usko Laaksnonen. Cun l gol dl 6 a 1 de Roberts Lipsbergs tl 37ejim meunt ova l Bregenzerwald la vënta te fuia. Chëi de Gherdëina à mo tucà la porta tl terzo tëmp cun Stephan Deluca, ma l resultat fova bele da giut tler. 6 a 2 per l Bregenzerwald y degun pont per l Gherdëina.

EK

L articul ntier tla edizion nueva de La Usc di Ladins de n vënderdi ai 19 de dezëmber.