La Usc di Ladins

En jöbia ai 22 de jená éla flacola gnüda portada fora por le zënter de Treviso, s’architan por la zerimoina ofiziala sön Piazza dei Signori. Chiló á n artist musizist badiot fat da tedofor. Philipp Mersa, conesciü cun l’inom d’ert Phil Mer, é chersciü sö a Calfosch y s’á cun l’eté de 13 agn trasferí te chësta cité olache al vir ciamó sëgn. 

Al á porté la flacola deboriada a süa familia y le musizist iconich Red Canzian – bassist di Pooh. L’ocajiun da porté la flacola é gnüda a s’al dé por mirit dla realisaziun dl inn por le iade dla flama, nasciü dala colabo­raziun danter i musizisć dla familia. »Cuori a tempo« é le titul dl inn por chël che Red Canzian, Phil Mer, Chiara Canzian y d’atres figöres de relief tl ciamp dla musiga s’á metü adöm por scinché n toch original ala manifestaziun sportiva che iniann se desfira por ai tan co dlungia ciasa. 

De süa esperiënza da tedofor nes á cunté Philipp Mersa te na cörta intervista, che i ciafëise da lí tla ediziun nöia de La Usc di Ladins da incö.