La Usc di Ladins

L temp de Carnascèr rua tel vif chisc dis enscin en mèrtesc gras ai 25 de firé, ma jà col prum de chest meis l paìsc de Vich à volù menèr ghesće sentadins tel gordeon de colores, musega e matitèdes de chest temp più algegher de l’an.

La ciasetes sui festii che da Nadèl era states fornides sù con i simboi de la Natività, les é states mudèdes te vedrines del Carnascèr tradizionèl ladin. En dut n’é 13 sun dut l tegnir de Vich, dai ciantons più sconec de Sèn Jan, Pilat, Piz e Val al zenter de paìsc e adertura a la frazions de Larcioné, Valongia e Tamion.

L’é doventà oramai na tradizion sentuda chela de fornir sù la ciasetes sot la festes da Nadèl, n projet che era stat envià via jai egn dal Comitat manifestazions de Vich e che ades é stat tout sù con gaissa dal nef Comitat Vich Events, che se à pissà chest an de lascèr fora la ciasetes sui festii e les viventèr coi segnes tradizionèi del Carnascèr. 

De gra al lurier de n bel numer de sentadins, singoi o a gropes, de sociazions desche de la Musega da Vich e la Crousc Checena, de l’Oratorie, de la Cèsa de Paussa, del Laboratorie Sozial, de la scoles populères de Vich e Poza e de la scola mesèna de Sèn Jan, duc chi che passa dinlongia n festil pel se fermèr e cuchèr ite per chel vierech per se fèr na marevea de duc i aspec de la tradizion fascèna del Carnascèr.   (mci)