La Usc di Ladins

Ti ultimes egn, semper te n fin de setemèna da d’uton, l Grop FAI (Fondo talian per l Ambient) de Fascia e Fiem ne à fat descorir picoi tesores, de spes ence pech cognosciui, a Moena, Pera e Ciampedel, e l an passà con sie president Gabriele Valentini Mambo e col Cai Sat Auta Fascia l ne à compagnà te anter la natura fin sa la viles de Lorenz, l Vera e Insom.

Chest an l apuntament con la giornèdes FAI da d’uton l é stat tel fin de setemèna passà: en sabeda ai 15 de otober la Delegazion de noscia valèdes à endò compagnà n bel grop de jent da Fascia, Fiem e ence da più dalonc, a cognoscer la testimonianzes de èrt, storia e cultura che se pel troèr te nesc paijes.

L apuntament é stat chest’outa sa Meida, frazion del Comun de Sèn Jan. Volontères e jent se à binà te Piaz de Sèn Nicolò, visavì l »Ski Stadium« de Aloch, lech de referiment per i pascioné de schi. L’atenzion ampò no é jita ai evenc sportives, ma al melaur artistich, storich e cultural che podon descorir te n picol raion.

A dèr l benvegnù e dèr con competenza la pruma informazions l é stat l president del FAI de Fascia e Fiem Gabriele Valentini Mambo e la professora Annalisa Zorzi, che jai egn l’à fat slarièr fora la Delegazion FAI de Fiem ence te noscia val, l’à rejonà en curt de l’emportanza de chest Fondo, che se cruzia de valorisèr, restaurèr e fèr cognoscer l patrimonie de èrt, natura e architetura de la Tèlia.

L é stat dapò l professor Cesare Bernard a rejonèr del fil ros che lea duc i lesc cernui per l apuntament de chest an del FAI: l’èga. Al Piaz de Sèn Nicolò olache se aea binà la jent – à deschiarì Bernard – n’outa i ge dijea »anter le aghe«, inom che é stat tout su dal Comun canche l é stat fat la neva toponomastica e che vegn dal fat che aló, da na man e da l’autra, corea apontin doi ruves, chel de Sèn Nicolò (enlouta ruf de Ruacia) e la roa che passèa presciapech olache ades l é la strèda de Meida e che era stata desvièda per ge portèr l’èga a la sia, al molin e ai etres manufac produtives ju per Meida. 

Podede lejer de più su La Usc stampèda de vender ai 21 de otober.  (Lucia Gross)