La Usc di Ladins

En dut i é set i candidac per l’encèria de President de la Provinzia de Trent che se à metù dant per la litazions dai 22 de otober. En lunesc ai 25 de setember l é stat fat l’estrazion del orden di candidac president e del orden de la listes coleèdes ai candidac per dezider la posizion su la zedoles litèles e l tabelon moscia tel orden chisc inomes: 1. Maurizio Fugatti de la Lega; 2. Alex Marini del Movimento 5 Stelle; 3. Francesco Valduga per Alleanza Democratica e Autonomista; 4. Filippo Degasperi con Onda Popolare; 5. Sergio Divina sostegnù da la listes ziviches de zenter dreta; 6. Elena Dardo con Alternativa; 7. Marco Rizzo con Democrazia Sovrana e Popolare. 
La listes enveze en dut les é 24.
Maurizio Fugatti é sostegnù da 8 listes: Noi Trentino per Fugatti presidente; Lega per Fugatti presidente; Fratelli d’Italia; Unione dei Democratici Cristiani e dei Democratici di Centro (UDC); Forza Italia; La Civica; Partito Autonomista Trentino Tirolese – PATT; e la lista ‘Fassa’.
Francesco Valduga é sostegnù da 7 listes: Italia Viva; Campobase; Alleanza Verdi e Sinistra; Casa Autonomia.Eu; Azione; Partito Democratico del Trentino; e la lista ‘Fascegn’
Filippo Degasperi é sostegnù da 3 listes: La me Val – Primiero Vanoi Mis; Onda; Unione Popolare.
Ence Sergio Divina é sostegnù da 3 listes: Giovani per Divina presidente; Noi con Divina presidente; Alternativa Popolare per il Trentino.  

Dant da sabeda ai 7 de otober vegnarà tacà fora i placac ti desvalives comuns.

Su La Usc stampèda de vender ai 29 de setember se pel lejer i inomes di 34 candidac de ogenuna de la doi listes de val.