La Usc di Ladins

L argoment era sun desch da meisc: Francesco Mazzel, pionier de la trasmiscions radiofoniches te Fascia, che del 1986 ensema con sie jorman Francesco Pitscheider aea creà »Radio Studio Record«, l aea intenzion de meter sia creatura te de autra mans. 

37 egn i é n muie, te chest temp entravegn gregn mudamenc e coi egn se smendra mingol la gaissa e se smaora la fadia. Segur no l é stat na dezijion sorida per Franz e per sia femena Giusy, e no l é stat sorì nience dut l iter per portèr a compiment chest passaje, ampò ades l moment é ruà.

Da pec dis la proprietà de Radio Studio Record é ofizialmenter passèda de man e la é stata touta su da na sozietà de Filippo Debertol, cognosciù hotelier e imprenditor de Cianacei, l é tel Comitat Esecutif de l’ApT de Fascia e president de l’ASAT de la Val de sora. 

Endèna ben segur te la programazion no l é mudà nia e l lurier jirà inant col coordenament del diretor Giorgio Pedron, i programes e la ousc de Biancarosa Florian. Ence Franz restarà amancol per n trat a portèr inant sia trasmiscion de informazion e la senta te chest moment resta chela a Gries. Ma bele prest se podarà tachèr a veder vèlch neva, descheche ne à confermà apontin l nef patron de la radio, Filippo Debertol.

De più su La Usc stampèda de vender ai 15 de dezember.  (Lucia Gross)