La Usc di Ladins

I »Ujes averc« l é n moment de valuta per i scolees percheche la families pel jir a scola a descorir la ativitèdes che se à dejout via per l an. Vegn endrezà, con na didatica mingol fora de anter, prejentazions, spetacoi, laboratories e jeghes.

La setemèna passèda per trei dis chest event l é stat metù a jir te la trei mesènes de Fascia. I prumes ujes che se à avert l é stat chi de mesèna de Sèn Jan, en mercol ai 21 de mé, en jebia ai 22 l é stat chi de Ciampedel e en ultima en vender ai 23 chi de Moena.
Daperdut i bec, compagné da si ensegnanc, i à portà dant a na moda gustegola ativitèdes che revèrda duta la materies de scola, e che à soscedà marevea e gran aprijiament da man di genitores e i parenc, ma ence de n publich manco ‘de cèsa’, che no se spetèa de veder scolees tant engaissé e enjigné.
Da la Divina Commedia de Dante o la trilogia de Calvino ai lengac foresć, dai stencil, modelins de ciastie de carton e segnalibres fac a man, a percorsc geologics, al ort e trop de più.
Chi che à tout pèrt é stac envié ence a se arcedèr te palestra o sun percorsc de orienteering, l é stat fat reflescions en cont de davegnir, inteligenza artifizièla e fake news, spetacoi de teater e esibizions de musega. Tel chèder de l’Aisciuda Ladina, vèlch clas de vigni mesèna se à cruzià de toponomastica ladina.

Se pel lejer dut su La Usc nr 20 dai 30 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.




 (NR/LG)