La Usc di Ladins

N’autra bela edizion de la Marcialonga Cycling Craft, la numer 17, se à dejout en domenia ai 25 de mé anter Fiem e Fascia. I complimenc maores chest an va a Patrick Facchini e Annalisa Prato, trentin de Val Giudicarie l prum e piemonteisa da Cuneo la seconda, che l é stat i più asvelc anter ic e eles a ruèr al travert del percors de 135 chilometres, che pean via da Pardac l li à fac jir fin sal Pas de Ciareja e dapò ju, do Neva ju e su per Pampeago e amò ite envers Fascia, su fin sun Sèn Pelegrin e ju per l Valles fin a ruèr endò a Pardac. Chiò a i spetèr co la garlanda l era la Soreghina Sofia Franzoni: do 4 ores, 11 menuc e 29 seconc dal start l’à podù premièr Patrick Facchini e dapò la pruma de eles Annalisa Prato, ruèda tel temp de 4h:54:18.
Autra premiazion con de gregn batiman per Davide Pantano (Asd Zerotest) e Elisa Leardini (Mgk Vis Promotech), che enceben sul mender percors de 80 chilometres no se à sparagnà gaissa, empegn e fadia per ruèr dant da duc.
Per chel che vèrda i ladins, per chi del percors lonch l maor sostegn del publich é jit a Manfred Mölgg, che a passèr dai schi a la roda l à perdù vèlch posizion ruan 47° te 4h:44:07; sul percors di 80 chilometres l sostegn maor é jit al campion de cèsa Cristian Zorzi.

Se pel lejer dut su La Usc nr 20 dai 30 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.




 (LG)