La Usc di Ladins

L’Union europeèna la é do che la vif n moment storich n muie delicat. I balanzamenc politics mondièi i é deldut mudé dal 2016 fin aldidanché e i seghitarà a l fèr ence ti egn che vegn.

Sion leteralmenter schicé anter la prescion de espanjion de la ambizions de Putin, i capric pericolousc del nef president di Stac Unii Donald Trump, la Cina che laora con gaissa de sconet e la crescimonia economica de Stac desche l’India e l Brasil. Te l’Union europeèna la forzes nazionalistes e xenofobes, ence de pensieres politics che con la fin de la Seconda vera someèa sepolii, ciapa semper maor consensc. A chest se jonta apede l tem de la defendura europeèna che somea cronaca de aldidanché ma la pruma proponeta nascea jà del 1954.

L besegn de na reforma fona de la Istituzions europeènes e l besegn fort de ge dèr forma a politiches europeènes reèles, zacan ledies dai recac di interesc nazionèi, stenta a ruèr ite te l’agenda politica de duc i dis, dal livel de Comun a chel nazionèl. Epura l’atività de la Istituzions europeènes, i temes che vegn touc dant a 360 degrees, posse dir per esperienza, i é n muie dalonc da chel che peissa i sentadins.

Dir ju de l’UE, metan a risech ence sia ejistenza, l é doventà beleche desche n mantra e n muie de paroles, de spes banales, troa semenza bona tel teren de l’ignoranza.

Se pel lejer dut su La Usc nr nr 19 dai 23 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Massimo Girardi)