La Usc di Ladins

Giustizia soziela y crisa tlimatica: Cërtl de dialogh
L Cunsëi de Furmazion de Urtijëi nvieia a na sëira cun referat y descuscion n con’ de tematiches sozieles
Pra l cërtl de dialogh n con’ dla giustizia soziela y la crisa tlimatica vàla de partì nosta idées, esperienzes y prupostes de soluzions y de abiné deberieda soluzions de co cunlië la giustizia soziela y cumbater la crisa tlimatica. Do na ntroduzion da pert di reladëures Katharina Erlacher y Martin Peer ti cialerons tl dialogh a ponc de ududa desfrënc n con’ dla tematica. Scumencion l dialogh pensan che deguni ne la sebe miecia di autri. La va de mparé deberieda, de scuvrì y de nventé.
L Cunsëi de Furmazion de Urtijëi nvieia n mierculdi ai 4 de juni dala 20:00 tla pitla sala dla Cësa di Cungresc al cërtl de dialogh, metù a jì deberieda al ufize de Furmazion dla Provinzia de Bulsan.

Cycling Demo – demo cun la roda
La Lia per Natura y Usanzes mët a jì na demostrazion per fermé l trafich de auti y per plu segurëza de chëi:les dala roda sun i jëufs ntëur al Mëisules
N se anconta n sada ai 1. de juni dala 09:00 pra la fermeda dla curieres sun Plan de Gralba, per furné deberieda cun la roda nchin sun Jëuf de Sela. L se trata de na demo acioche l vënie fat zeche contra l trafich auto­mubilistich sun i jëufs ntëur al Sela, che ie true’ de massa per la cuntreda y la natura, sibe dal pont de ududa de mpaziamënt dl ambient y dl’aria, che nce mpaziamënt acustich.
Sëuraprò nen vàl nce dla se­­gurëza per chëi dala roda. A duc y dutes l nvit de fé pea. La manifestazion fina dala 11:00.

Mostra TO BE A MAN – de Erich Hörtnagl
L Circolo–Lia Mostra d’Ert nvieia de cuer ala giaurida dla mostra fotografica tl self dla lia, ai 6 de juni dala 19:00
Dala 20:00 saràl na descuscion cun prejentazion dl liber »To be a man« dl fotograf y reghisser svedesc-austriach Erich Hörtnagl. Alois Schöpf rujenerà cun Peter Demetz y cun l artist.
La fotografies ie usservazions de ëi che fej pert de cultures y ambienc de vita desfrënc, na reprejentazion dla pusciblteies de cie che vester ël y persona possa ulëi dì al didancuei. Ma l ie nce n nvit a rujené y se giamië ora minonghes n con’ di ëi, dla funzions dl’ëila y dl ël y si stereotips. La fotografies ie a blanch y fosch cun sfumadures grijes y si dumbries.
La mostra resterà da udëi nchin ai 29 de juni: merdi – dumënia: 16:00-19:00, de sada y dumënia nce danmesdì, 10:00-12:00.

Cunzert: Viva la Vida
Cunzert dla Grupa Helios y Lady Voices ai 8 de juni a Urtijëi
La Grupa Helios y la grupa Lady Voices de Funes nvieia a n bel cunzert cun mujiga pop n dumënia ai 8 de juni tla Gran Sala tla Cësa di Cungresc a Urtijëi dala 20:00. La doi grupes de jëuni, liedes dala medema pascion per la mujiga, se à metù adum per mëter a jì n blòt pruiet: n cunzert dal titul «Viva la Vida». L sarà da audì cianties pop d’uni sort y da druch, che dà inant legrëza de viver – propi coche dij l titul dl cunzert.
Per chi che ne n’à nia dl’aurela ai 8 de juni: la sëira dant, ai 7 de juni, uniràl fat n cunzert nce a S. Piere te Funes, dala 20:00 tla Sala di Cungresc.
La Grupes Helios y Lady Voices se ncunforta sun vosc unì!