La Usc di Ladins

Ma co éla proprio proprio chesta costion di Turchi a Moena? A vardèr i social l é na storia vera, anzi, chi (ence se i é da Moena) che se fida palesèr vèlch dubie, i cognessa fèr acort e jir a ge vardèr, a chel festil col turco: auter che no l é vera! Coscita disc l ‘popol de facebook’.

Ben segur canche no se sà dalvers la robes l é fazile ge recamèr sora conties e lejendes. Mingol coscita la é stata ence per chel cianton de Moena, olache somea che i sie stac tant valenc da ge dèr azet per n trat a n sudà otoman sciampà da Viena del 1683, o che adertura chest forest col turbant se aesse enciasà e l aesse dat vita a na ‘jenia’, n picol popol de naa turca che à tegnù su stolz sia reijes, sotrissèdes metan fora steila e mesa luna rossa daperdut.
Ipotesi n é jit stroz desvalives, ti egn, e canche chest an Moena l é doventà la (faussa) location de la miniserie televisiva »Il turco«, reclamisèda desche n ‘kolossal’ col didament del protagonist ‘figo’ l ator e model Can Yaman, l debatit su la storia vera del ‘Turco da Moena’ à ciapà ben segur amò maor lèrga ence sui social... e se sà che canche se trata de marketing, che se n rejone ben o che se n rejone mèl, l emportant l é che se n rejone.

A proèr a descrosolèr fora la costion con mingol de fondament e a desgatièr l nomescel engatià dai social, l é stat l prum de aost Fabio Chiocchetti, envià a fèr mingol de lum sun chest argoment da la Magnifica Comunità de Fiem.
 (Lucia Gross)