La Usc di Ladins

50 egn e no i sentir. Se pel proprio dir coscita del Giro de le Notole de Moena che chest an, apede a festejar l bel travert, l à ence segnà l record de scric ite, anter i agonisć e no, n era 650. La garejada, con partenza e travert te Sotegrava, é stata la sera de en jebia ai 14 de aost, per endrez de la sociazion sportiva Monti Pallidi. En dut 6 chilometres entorn paisc, su fin sa Someda, ja Le Part, sun Ciajeole e deretorn te piaz. Chest an, en ocajion di 50 egn torogn, se podea tor part con na mondura sportiva di egn ’60 e a duc i scric ite del 1975 ge vegnia dat n gadget spezial.

Coscita n bel grum de notole se à prejentà te piaz entorn le nef da sera, n sgol de colores e de legreza, de chi che é ponté via coran e de chi che enveze é jic a pe, zenza gran prescia, per se goder en compagnia. De gra al didament de tropes volontadives e sponsor dut à garatà.

L prum a ruar al travert l é stat Daniele Felicetti de la Monti Pallidi te 20 menuc e 59’’, nience n menut do (21’57’’) l é ruà Nicolò Zorzi de la Cauriol e terzo Francesco Zorzi del Cermis col temp de 22’07’’. Quarto Damiano Casagranda de l’Atletica Val de Cembra e quinto Alessandro Chiocchetti del restorant la Serenella.

Se pel lejer dut su La Usc nr 32 dai 22 de aost: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Monica Cigolla)