A la biraria Crighel Bräu de Moena l é stat recordà l cedean del emperador Franz Joseph e del beat Carl I d’Austria con intervenc de storia e identità.
Per no desmentiar noscia storia e per jir inant con nosce tradizion. L é stat con chest spirit che l é stat endrezà en lunesc ai 18 de aost da man del Grop de Folclor de Soraga e n grop de Scizeres de Fasha la radunanza en onor del emperador Franz Joseph per so cedean. Per chesta ocajion se à binà n bel grop de amisc e peconc a la biraria Crighel Bräu de Moena de Mirko Pederiva da Soraga, olache duc à spartì n gustegol moment de festa con la musega de cater bravi joegn sonadores.
La festa la é stata dopia: l é stat recordà i 195 egn del emperador Franz Joseph, nasciù ai 18 de aost del 1830, ma ence l complian del beat Carl I d’Austria, nasciù ai 17 de aost del 1887.
Do l salut de benvegnù de Andrea Pellegrin
l é stat l moment di referac. La fegura del beat Carl I, ultim emperador d’Austria-Ungheria dal 1916 al 1918, é stata uzada fora da Franz Dellantonio Tasin che à metù al luster soraldut so messaje de pasc. »Ai 3 de otober del 2004 Carl I vegn beatificà da Papa Jan Paul II per aer semper cerì la pasc – à dit Dellantonio col lejer ju le parole del beat dal sfoi dat fora en ocajion del pelegrinaje endrezà da la Federazion di Scizeres del Welschtirol che à portà stroz via per dut l an passà soa reliquia -. Desche emperador dut mie empegn l é ge jir do a la volontà de Die, faré dut che che posse per tegnir demez i orores de la vera più che l é meso e per ge dar a mie popul la benediscion de la pasc menciada.« Messajes che é amò n muie atuai ence aldidanché te chest contest storich segnà da le vere.
Se pel lejer dut su La Usc nr 32 dai 22 de aost: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper. (Monica Cigolla)
