La Usc di Ladins

N lunesc ai 11 de agost iel stat n ntervënt per n’emergënza sanitera a S. Cristina. Do la prima cures àn menà l pazient cun l joler a Persenon te spedel.
N chël danmesdì àn damandà l joler cueciun japé dla via fereda de Roda de Vael, ulache na jëuna se ova giapà ados n sas. Davia che l ne fova nia saurì da ti ruvé permez, àn lascià ju l dutor y l sucoridëur cun na binda da 35 metri. Chisc à stabilisà la jëuna tl sach dla binda y n l’à pona trata su tl joler per julé limpea tl spedel de Bulsan.
Riesc do àn mo menà a Burnech n pazient che se ova fat mel al jenodl sëura l lech Lagazuoi.
Ai 12 de agost à l Aiut Alpin fat cater ntervënc, un de chisc tl raion ladin, plu avisa sun Sas dla Crusc: un de doi arpizadëures se ova ntort n jenodl sun l «Grande Muro» y ne fova nia plu bon de jì inant. N à trat su tl joler tramedoi, uniun cun na binda de 90 metri, per i mené a Badia, ulache n i à sëurandac ai Judacrëp de Badia.

De plu tla edizion stampeda de La Usc di Ladins o sun l e-paper a paiament www.lausc.it/e-paper